Rape victim - Gula 11

Natulala si Richard nga nakadungog sa gisulti ni Lanie nga nabiktima siya sa pagpanglugos ug nga siya ang nagpatay sa tawo kang kansang lawas nga wala na’y ulo napalgan daplin sa sapa nga nahimutangan nila karong hapona.

Karon nakaamgo na ang police detective nga mao diay nga gusto ni Lanie nga anhi sila magsultihanay daplin sa sapa kay may mahinungdanon diay kini nga ikumpisal kaniya. “Sige na Richard, kuhaa na kanang posas nga anaa sa imong hawak ug posasi ko.. usa ako ka kriminal,” nagbakho si Lanie nga padayong midudho sa duha niya ka kamot ngadto ni Richard.

Nahinumdom si Richard sa gisulti sa ilang hepe sa kapolisan nga misaad nga irekomendar siya’g promosyon sa iyang ranggo kun masulbad niya ang krimen nga pagpatay sa tawo nga giputlan sa iyang ulo daplin sa sapa.

Apan naglisod si Richard sa pagdesisyon. Dili usab niya ikalimod sa iyang kaugalingon nga nahigugma siya kang Lanie. Gigakos ni Richard si Lanie ug gihagkan. “Adto ta magsultihanay sa unahan nga layo gikan dinhi sa dalan kay basin og adunay makakita kanato ug lainon unya sa pagsabot,” giingnan ni Richard ang dalaga.

Giagbayan ni Richard si Lanie ug misud sila sa kasagbotan. Nalantaw ni Lanie ang dapit diin didto siya giamong-amongan sa lalaki nga iyang gipatay. Karon, gidala usab siya ni Richard sa mao gihapon nga kasagbotan. May kabalaka si Lanie basin og may dautang plano si Richard.

May nakita sila nga dakung bato nga panas nga nindot kaayo’ng lingkoran. Kini maoy girombo nila ni Richard. Gihukas ni Richard ang iyang jacket. Nasigpatan ni Lanie ang kalibre 45 nga pistola ni Richard nga diha ra diay tagoi sa iyang likud. (Sumpayan)