Rape victim - Gula 11
Nakabantay si Richard nga naghinuktok si Lanie samtang miakbo kini sa nagbad-ay nga sanga sa kahoy nga nag-umbaw sa sapa.
“May nakahasol ba sa imong huna-huna Lan? Dia kita karon dinhi sa daplin sa sapa kay mao may giingon nimo nga anhi ka mohukom kabahin sa gugma nga akong gihalad kanimo,” matud ni Richard. Nagpabilin nga walay timik si Lanie. Nabatyagan na lang ni Richard nga naghilak na diay si Lanie tungod kay misugod na pag-uyog ang iyang abaga samtang nagbakho sa hilom. “Lanie naunsa ka? Nganong mihilak ka man?” gisukna ni Richard ang dalaga dungan sa paghikap sa iyang abaga.
Misamot hinuon sa pagbakho si Lanie ug anam-anam nga miatubang sa higala niya nga police detective. “Richard, angkonon nako nga nahigugma usab ako kanimo apan anugon lang ang maong pagbati kay dili na ako angay kanimo,” matud ni Lanie nga padayong naghilak.
“Salamat kaayo kun mao kana Lan. Apan ngano man nga dili ka man angay sa akong gugma?” ni Richard pa nga gisanapan sa tumang kahibulong. “Biktima ako sa pagpanglugos Richard. Dinhi’ng dapita ako giamong-amongan,” matud ni Lanie.
“Kadtong tawo nga napalgang patay ug giputlan sa ulo dinhing dapita sayo niini’ng buwana mao ang miamong-among kanako,” dugang ni Lanie nga nagbakho.
“Unsa? Apan kinsa’y nagpatay kaniya? Nakaila ka ba Lan?” pangutana sa police detective. Wala dayon motubag si Lanie. Apan taud-taud, gitunol niini ang duha niya ka kamot ngadto kang Richard.
“Dakpa ko Richard… ako’y nagpatay sa mao nga tawo nga milugos kanako,” matud ni Lanie nga nagbakho ug gisanapan ang mga mata sa luha. (Sumpayan)
- Latest
