Rape victim

Gula 10

Diha’ng nakabangon na si Lanie sa iyang higdaanan, miatubang siya sa salamin aron makita ang iyang panagway. Human masudlay ang iyang buhok, migawas si Lanie gikan sa iyang kuwarto ug nakita si Richard nga naglingkod sa balkon sa ilang balay.

“Good afternoon Lan. Wala g’yud nako sipyata ang pag-anhi kay naghinam-hinam ko taliwala sa kabalaka nga basin og maangkon ko ang kapakyasan sa gugma,” matud ni Richard. Igo lang mipahiyom og hilaw si Lanie.

Milingkod si Lanie sa atbang nga lingkoranan. Nasigpatan ni Lanie gikan sa relo ni Richard nga alas singko na sa hapon. “Adto ta sa daplin sa sapa Richard. Maayo didto kay mingaw ang lugar, may ikumpisal ko nimo,” ni Lanie nga miuna sa pagtindog.

Mora’g nakabantay si Lanie nga miisa ang kilay ni Richard nga wala makasabot sa iyang gisulti. Una nga nanaog si Lanie sa hagdan ug milakaw subay sa gamay’ng dalan-dalan paingon sa sapa sa kinaubsan.

Natungod na sila sa pangpang nga gilabayan ni Lanie sa sako’s bugas nga gisudlan niya sa putol nga ulo sa lalaki nga gipatay niya human siya giamong-amongan. “Lawom ‘sab kini’ng mao nga pangpang Lan no?” matud ni Richard.

Mihunong sa paglakaw si Lanie ug gilingi si Richard nga mihana sa pagdung-aw sa pangpang. Misamot ang gibati nga kabalaka ni Lanie kay basin makit-an niini sa ubos ang sako nga gisudlan niya sa putol nga ulo sa tawo nga iyang napatay.

Nalantawan  g’yud tuod ni Lanie ang sako nga didto sa ubos. Wala na siya makalahutay sa pagtan-aw ug mibalik siya sa dalan. Misunod na lang ‘sab si Richard kaniya. Padayon sila nga milakaw ug hangtud nga miabot sila sa apit nga didto gilugos si Lanie.

Mihilom si Lanie ug ang iyang panan-aw gipunting niya sa halayo nga unahan. (Sumpayan)