Rape victim

Gula 6

Sa hilom gikulbaan si Lanie diha nga nahibaw-an niya nga siya diay ang target sa misyon ni Richard. “Makasalig ba ko nga dili mahibaw-an sa uban ang akong misyon dinhi sa inyo?” matud ni Richard.

Dugay’ng nakatingog si Lanie, mora siya’g nasud-ipan sa kasayuran nga iyang nahibaw-an. Gikan niadto, mora’g mataha na si Lanie nga makigsuod pa kang Richard. Gusto na siya nga muabot ang adlaw nga mobalik na siya sa siyudad.

Nabalaka siya nga basin og mahibaw-an ni Richard nga siya diay ang nagpatay sa lalaki nga milugos kaniya diin ang ulo wala pa gani makit-i kay gitambog niya sa pangpang. May mga oras nga dili kapugngan ni Lanie ang paghinuktok. Naglibog siya kun unsa ang iyang buhaton.

Sa higayon nga muadto si Richard sa ilang balay, bation niya ang kakulba. Nakabantay diay si Richard sa dako nga kausaban sa iyang batasan nga mora og nagluya ug wala na ganahi nga makigsulti sa higala niya’ng detective.

“Naunsa ka man Lan. May nahimo ba ko nga nakapasuko nimo?” pangutana ni Richard kang Lanie. Mipahiyom og hilaw si Lanie. “Wala, wala kay nahimo’ng sala kanako Richard,” bugnaw kaayo’ng tingog sa dalaga.

“Unsa nay kalamboan sa imong pag-imbestigar?” gipangutana niya si Richard. “Wala pa lagi g’yud ko makakuha og lead. May nakasulti nako nga kadto diay kuno nga lalaki maoy suspek sa pagpanglugos dinhi, pero kun kinsa ang mipatay kaniya, wala pa ko masayod,” ni Richard pa.

Mihilom kadiyot si Lanie. Milabay ang mga adlaw. Miabot g’yud ang higayon nga nanguyab si Richard sa dalaga. Wala masayod si Lanie kun unsay iyang buhaton. Sa hilom nakagusto usab siya sa detective. (Sumpayan)