Rape victim

Gula 5

Milabay na lang ang duha ka semana ug wala pa gayud hiilhi kinsa ang tawo nga napatay ni Lanie nga milugos kaniya ug mao usab ang gituohan nga miamong-among sa ubang mga babaye nga iyang silingan nga naglakip sa mga minyo.

Usa ka buwan lang ang pananghid ni Lanie sa iyang gitrabahoan sa dakbayan sa Sugbo nga mopahuway. Gusto ni Lanie nga hikalimtan  ang iyang gidangatan sa mga kamot sa lalaki nga iyang napatay.

Nahuna-huna ni Lanie nga walay nasayod sa maong hitabo nga paglugos kaniya gawas lang kanila’ng duha mao nga wala ‘say nahibawo nga siya ang nakapatay sa rapist. Usa ka adlaw, dunay tawo nga miadto sa ilang lugar ug nakighigala kini kang Lanie.

Dali ra sila nga nagkasuod. Tuod man, gibisitahan si Lanie sa maong tawo didto sa ilang balay ug atol nga wala ang mga ginikanan sa dalaga. Nakabantay si Lanie nga adunay armas ang tawo nga giluklok sa iyang hawak.

Gikulbaan si Lanie. Wala siya makasabot sa iyang gibati. Nagsagol ang diha sa iyang huna-huna. May katahap siya nga dautang tawo si Richard nga nakighigala kaniya ug mahimo usab nga suloguon kini sa balaod.

Wala makaantos si Lanie, iyang gipangutana si Richard kun ngano nga aduna siya’y armas. Misuway unta pagpamalibad si Richard apan wala na siya makalimod kay gihikap dayon ni Lanie ang armas nga nagbugol sa iyang kilid.

“Ayaw pagsaba Lanie, mosalig na lang ko nimo kay suod kita nga maghigala. Usa ako ka polis nga nadistino sa intelligence unit. Akong misyon ang pag-imbestigar ug pag-ila kinsa ang nakapatay niadto’ng tawo nga giputlan sa iyang liog diha sa may sapa,” matud ni Richard. (Sumpayan)