Rape victim - Gula 4

“Ngitngit bitaw kaayo Ma sa pag-agi nako sa daplin sa sapa mao nga mipaspas ko paglakaw,” matud ni Lanie nga wala motug-an sa iyang inahan sa hitabo. Gipatuo niya ang iyang inahan nga gisingot siya pag-ayo ug gusto nga maligo sa tubod nga nahimutang duol ra sa ilang balay.

Ang tinuod nga tumong ni Lanie mao nga kun dunay pinisik nga dugo sa iyang sinena tungod sa pagpatay niya sa lalaki nga milugos kaniya mahanaw kini kay iya man nga labhan ang iyang gisul-ob.

Nag-inusara lang si Lanie nga naligo sa tubod. Bisan og bugnaw kaayo ang tubig kay lawom na ang gabii, apan init ang iyang kalawasan ug nagbutok-butok ang iyang dughan kay nagsagol ang kalagot ug kakulba nga iyang gibati tungod sa nahitabo.

Wala na makigsulti si Lanie sa iyang inahan kay gipatuo niya nga gikapoy siya sa biyahe. Pagka-ugma sa buntag, gipukaw si Lanie sa iyang inahan nga nagpahibawo nga may patay’ng lawas sa usa ka lalaki nga gipunggotan sa iyang ulo daplin sa sapa. Nagpatuo si Lanie nga nakurat. Miuban si Lanie sa iyang inahan pag-adto daplin sa sapa. Daghan na’ng mga tawo ang midugok sa patay’ng lawas nga maayo’ng pagkaputol ang liog.

“Kinsa kaha ning tawhana nga gipatay? Hain na kaha ang iyang ulo? Dili ba kaha kini mao ang kanunay mang-rape dinhi? Kinsa man ‘sab kaha ang nakapatay niya?” lainlaing pangutana gikan sa mga tawo nga midugok sa patay’ng lawas.

Wala magtingog si Lanie ug sa hilom, misurok ang iyang dugo nga nagtan-aw sa lawas sa mao’ng tawo nga miamong-among kaniya. “Nakabawos na g’yud ko kanimo,” matud ni Lanie ngadto sa iyang kaugalingon.

Walay kasayuran ang mga tawo nga ang ulo sa tawo nga gisulod ni Lanie sa sako’s bugas tua ra gilabay sa pangpang nga may igo-igo’ng gilay-on gikan sa nahitaboan. (Sumpayan)