Giluod sa dagway

Sus! Kung aduna ka pay ikog animala ka, unggoy gyud nga tan-awon nianangdagway nimo!” mabiay-mabiayon nga mga pulong ni Sheena, iyang kapuyo.

Lud-on ko nga magtan-aw nianang imong hitsura. Ug mentras wa pa kita makasal, magbulag ta!” “A-apan wala ko’y sala nga nabuhat,” pakiluoy ni Jherwin.

“Wala bitaw. Apan nakahukom na ko. Ug mao kana ang akong desisyon,” pintok niining tubag.  Wa gyud mausab ang hukom ni Sheena bisan pa og iya kining gipatuloan sa iyang mga luha ug giluhod-luhoran aron lang maluoy. Miuli gyud kini sa iyang mga ginikanan, biniyaan siya nga nag-inusara. Naglibog siya sa kalit nga kausaban sa taras ni Sheena. Nahanaw na ang kanhi hinayon ug paraygon niining tingog nga maoy pipila ka hiyas nga nakapadani sa iyang pagbati kaniadto. Milubad ang kinaiya ni Sheena.

Sukad niadto wala’y adlaw nga dili hubog si Jherwin. Lumsan niya sa bino ang iyang kaugalingon aron maiban-ibanan ang iyang kasakit sa iyang dughan.

Dihay pipila ka higayon nga iya kining gisungko didto sa balay sa mga ginikanan ni Sheena. Namasin siya nga maluoy na kini kaniya. Apan nagpabilin nga tig-a kini ug kasingkasing. Bisan gani ang iyang kaugalingong inahan, giapil og banghag ni Sheena dihang misuway og hilot sa ilang bangi. Tungod ning mapait nga kasinatian ni Jherwin sa gugma, napasagdan niya ang iyang kaugalingon lakip na ang iyang trabaho. Hangtud nga natangtang siya sa trabaho tungod sa kanunay nga pagpalta.

Dala ang masakit nga gidangatan sa iyang gugma, mipauli si Jherwin sa iyang ginikanan. Ug natugkad niya karon unsa kadako ang kadaut sa iyang ugma tungod sa pagkaulipon niya sa gugma ngadto kang Sheena.

Niini karong gabhiona, nakahukom si Jherwin. Molingkawas siya sa sulad nga mugna sa gugma ni Sheena. Nag-areglar siya sa iyang kaugalingon. Pamisitahan niya si Khamil, ang babaye nga nakagusto kaniya kaniadto apan wala niya mahatagi og tugbang nga pagbati. Apan pag-abli niya sa pultahan sa ilang balay, maoy misugat sa iyang mga mata ang pamayhon sa usa ka babaye nga sinati niya kaayo. Dili ikahubit sa pulong ang kalipay nga iyang gibati.

“Pasayloa ko Jherwin sa akong nabuhat ug nasulti nimo kaniadto,” nagpakiluoy kini kaniya. Luhaan ang mga mata.

Gusto unta niya kining gakson apan nahimut-okan siya. Dihay kausaban sa panglawas niini. “Imong anak kining akong gisabak. Buntis diay ko niadtong nakigbulag ko nimo kay bati-an ug lud-on ko nga magtan-aw sa imong dagway,” pamahayag ni Sheena.

“Da! Daan pa lagi ko nga pangala ra gyud to,” sagbat sa inahan ni Jherwin nga diha ra diay sa ilang duol ug nagpaminaw. (Kataposan)