Rape victim

Gula 1

Mihugop ang katawhan sa kalibonan nga bahin sa Sitio Kamingawan nga sakop sa Barangay Antuwanga kay adunay nakit-an nga lawas sa usa ka lalaki nga wala na’y ulo. Giputlan sa iyang liog ang mao nga lalaki ug didto na mapalgi ang ulo daplin sa sapa.

May samad dinunggaban ang lawas sa maong tawo. Misamot kaikag ang mga tawo kay nahukas ang karsones sa mao nga lalaki ug nakita nga giputlan kini sa labing pribado’ng parte sa iyang lawas. Nakapanglingo-lingo ang mga tawo nga nagtan-aw.

Usa si Lanie nga mihugop sa patay’ng lawas. Nagpakahilom lang si Lanie nga nagtan-aw sa patay’ng lawas sa tawo apan sa hilom nagkagot ang iyang mga bag-ang tungod kay mao kini ang miamong-among ug mipusgay sa iyang kaputli kagabii.

Wala gayud mapanalipdi ni Lanie ang iyang kahuyang tungod kay adunay gibitbit nga sundang ang lalaki nga miatang kaniya sa daplin sa sapa. Gikan sa siyudad sa Sugbo si Lanie ug mipauli sa ilang barangay aron pahibaw-on ang iyang ginikanan nga magminyo na sila ug ang iyang boyfriend.

Gikan sa karsada, kinahanglan pa nga maglakaw si Lanie paingon sa ilang balay nga nahimutang kilid sa bungtod nga nag-umbaw sa kinabag-an nga kabalayan sa Barangay Antuwanga.

Diha’ng nagdanga-danga na si Lanie daplin sa sapa nga gitawag og Kamingawan, nanglimbawot ang iyang balhibo. Nakahinumdom siya sa gisulti sa iyang inahan pag-adto niini sa iyang gitrabahoan nga dunay ilang mga silingan, apil gani ang mga minyo, nga gipanglugos dinhi’ng dapita.

Paspas ang paglakaw ni Lanie apan kalit lang may migunit kaniya ug misap-ong sa iyang baba. Nanglimbasog si Lanie pagsukol, apan giingnan siya sa lalaki nga tigbason kun mosukol. (Sumpayan)