Gipahibalo sa kalag

Suod kaayo nga manag-amigo si Samuel ug Carlo, tungod kay gawas nga iya kining pag-umangkon si Carlo, kauban usab kini niya sa trabaho didto sa pantalan, isip mga “bagger” sa usa ka bodega.

Usa si Samuel sa gitahasan sa kompaniya nga maoy mangulo sa trabaho sa usa ka bodega nga nahimutang sa pantalan dinhi sa dakbayan sa Sugbo ug iyang gikuha ang serbisyo sa iyang pag-umangkon nga si Carlo aron maoy makaabag sa iyang gimbuhaton.

Apan usa ka higayon niana samtang sila nagtrabaho, kalit gikulbaan si Samuel dihang iyang nakita si Carlo nga naglakaw nga walay anino.

“Carlo, Dong wala kay sakit?” pangutana ni Samuel ngadto sa iyang pag-umangkon. “Kay ngano diay tiyo Samuel?” tubag usab ni Carlo sa iyang uyoan nga nahibulong pag-ayo.

“Ah, wala! Basin panan-aw ko lang kadto,” matud ni Samuel.

Pagka hapon niana, human sa ilang trabaho, nagdungan sila sa pagpauli sa lungsod sa Cordova diin sila nagpuyo. Unya pagkabuntag, sayo nga gipukaw ni Samuel ang iyang pag-umangkon, aron sa pagpangandam sa ilang trabaho.

“Carlo, Carlo, tana! Mangadto na ta,” sampit ni Samuel sa iyang pag-umangkon.

“Naglain akong lawas tiyo Samuel, dili usa ako motrabaho, balibad ni Carlo sa iyang uyoan.

Apan pagka alas 10:00 sa buntag nahibulong si Samuel, kay kalit nga nibutho si Carlo sa ilang gitrabahoan.

“Tiyo Samuel, paulion ka ni papa, ni Carlo nga bugnaw kaayo ang mga tingog.

“Kay ngano man Dong, Carlo?” pangutana ni Samuel sa iyang pag-umangkon.

“Wala ko kahibalo tiyo, pero masulub-on man to sila,” matud ni Carlo dayo’g talikod.

Buot pa unta nga magpakisayod si Samuel kung unsay hinungdan, apan wala na siya paminawa ni Carlo, busa human makapananghid sa iyang labaw, niuli dayon si Samuel sa Cordova apan dako ang iyang kakurat sa iyang nakita.

“Unsa ning hitaboa gaw Paustino nganong naghilak mo?” pangutana ni Samuel ngadto sa amahan ni Carlo.

“Patay na si Carlo gaw Samuel, giataki sa kasing-kasing,” tubag ni Paustino nga naghuot ang dughan sa kasubo.

“Apan didto si Carlo kaganiha sa among gitrabahoan, siya ang nagpahibalo kanako nga paulion ko dinhi sa Cordova,” ni Samuel nga gibati og kahibulong.

“Iya tingali kadtong kalag ni Carlo, gaw Samuel, tungod kay suod kamo kaayo sa akong anak ug kauban pa gyud kamo sa trabaho, busa iya kang gipahibalo sa iyang pagpanaw,” matud ni Paustino nga nagluha ang mga mata sa kasubo. (Katapusan)