I love you Tessa

Nangandoy si Glenn nga karong Sabado atol sa pagsaulog sa adlaw sa mga kalag ikahimamat unta niya pag-usab si Tessa, ang babaye nga iyang gikarelasyon human sila magkaila sa menteryo sa miagi’ng “kalag-kalag.”

Wala na gayud magpakita kaniya si Tessa human sa nahitabo kanila sa usa ka motel. Wala masayod si Glenn kun unsay hinungdan nga wala na man gayud magpakita kaniya si Tessa. Naglaom si Glenn nga mobisita si Tessa sa lubong sa iyang apohan karong Sabado aron sila magkita pag-usab.

Hapon na kadto sa Nobiyembre 1, 2013. Giduaw ni Glenn ang lubong sa namatay niya nga mga ginikanan. Nadapit ang iyang pagtagad sa babaye nga miabot ug nangunay gayud sa paglimpyo sa hugaw na kaayo nga nitso.

Gitan-aw ni Glenn ang nitso ug nakita niya nga upat ka tuig na nga namatay ang tawo nga gibisitahan sa mao nga babaye. Taud-taud, dunay mga bata nga miduol sa babaye ug mitanyag sa ilang serbisyo nga sila ang mulimpyo.

Milingi kang Glenn ang babaye ug midalit og matam-is nga pahiyom. Gibugtian usab ni Glenn ang pahiyom sa babaye. “Imo ba kana’ng inahan ang imong gibisitahan?” miuna pagpangutana si Glenn sa babaye. Igo ra kini nga mitangdo.

Mihinay-hinay na sa pagtikyop ang kangitngit. Bisan tuod og daghang mga suga nga kaganina ra nagsiga, apan may pagka ngiob ang lubong sa inahan sa mao nga babaye. “Magpasuga unta ko, pila kaha’y bayad?” matud sa babaye. Gitug-anan ni Glenn nga P250 ang bayad sa tulo ka gabii nga pagpasuga sa lubong sa Caretta Cemetery. “Gusto ka, ubanan tika pagbayad,” boluntaryo nga gitanyagan ni Glenn ang babaye. “Sige bi, kay wala kaayo ko masuheto,” dali’ng tubag sa babaye.

Didto nagka-ila sila si Tessa ug Glenn. Imbes mopauli unta og sayo si Glenn, apan tungod ni Tessa milahutay siya ug giagad na ang dalaga kun kanus-a mopauli. (Sumpayan)