Goodbye Maricel

Nakabantay si Albino nga mata’g karon ug unya mopasiklap kaniya si Riza nga amiga’ng babaye ni Maricel. Madanihon usab si Riza nga dili maglagyo’g kaanyag ug si Maricel. Taud-taud nananghid si Riza kanila ni Maricel ug Albino nga mouna na siya paglakaw.

Gibinlan pa og salabtonon kaayo’ng kidhat ni Riza si Albino diha nga wala makabantay kaniya si Maricel. “Unsa’y gisulti ni Riza nimo Al dihang wala ko?” matud ni Maricel nga mora’g nanagat og inpormasyon.

“Wala kami gipanagsultihan bahin nimo Mar,” matud ni Albino. Gisultihan ni Albino si Maricel nga gusto niya nga ugma atol sa iyang birthday dad-on niya kini sa ilang panimalay aron nga magkahimamat ug sa iyang mga ginikanan.

Nagdumili unta si Maricel apan mapugsanon kaayo si Albino. Nadala ra g’yud niya si Maricel sa tanto nga pagparayeg. “Nasayod ko Al nga moabot ra ang higayon nga imo ako nga talikdan ug kanang adlawa mahisama ra nga katapusan na sa kalibutan,” ni Maricel.

Gipasaligan ni Albino nga dili gayud kana mahitabo tungod kay panagsa ra siya mahigugma ug gusto gani niya nga magpakasal na sila si Maricel. “Dili kana mahitabo kanato Al,” lantip nga pamahayag ni Maricel.

Ingon sa nahimut-okan si Albino. “Ngano’ng dili man mahitabo? Dalaga ka ug ulitawo ko nga walay kabilinggan Mar, walay makapugong kanato sa pagminyo,” pasabot ni Albino dungan sa paghapuhap sa buko-buko anam-anam niya nga gigakos si Maricel. Gihatud ni Albino si Maricel sa iyang gipuy-an sa Barangay Day-as. Giingnan kini nga kuhaon niya si Maricel inigkaugma sa hapon. Giabisohan na ni Albino ang iyang mga ginikanan nga bisita niya ang iyang maanyag nga girlfriend.

Naghinam-hinam usab ang mga ginikanan ni Albino nga makita ang ilang umagaron. Pagkaugma, gikuha na ni Albino si Maricel. “Ma, mao kini si Maricel nga akong girlfriend,” paila ni Albino. (Sumpayan)