Abogado o albularyo

Sa nag-eskuyla pa og abogasiya si Albert, nagtrabaho siya isip clerk sa bupete ni Atty. Paterno Aroga. Kay ikatulo na niyang kurso ang abogasiya nanarbaho na siya. Ang una, Computer Science. Ikaduha, Accountancy. Unya di na mogasto iyang amahan sa ikatulong kurso kay may walo pa siya ka manghod nga gastohan sa ilang pagtungha.

Magabii ra man ang klase sa abogasiya. Busa, full time gyud siyang nag-alagad sa bupete sa iyang amo. Maayo modasig niya si Atty. Aroga. Gihatagan siya’g mga tips sa pagtubag sa mga pangutana sa bar exams. Gitambagan sab siya nga magmemorya og mga Latin maxims (sayings) sa tanang subjects.

Gituman niya ang tambag sa amo. Sa walo ka subjects sa abogasiya, nagtener siya’g walo ka   notebook. Sulatan niya sa mga Latin maxims. “Maka-impress na sa mokoreher sa imong mga answer sa bar exams kun mositar ka’g mga Latin maxim’s ni Atty. Aroga, usa ka hapon nga mingaw ang bupete kay way kliyente nga nasuroy.

Sa pagmemorya niya’g mga Latin maxims, nikibot lang ang baba ni Albert. Sama sa Nemo dat quod non habet, Nemo cum alterius detrimento protest, Salus populi est suprema lex, Sec utere tu ut alienum non laidas, Cessantre ratione, cessat ipsa lex, Res ipsa loquitor ug uban pa. Mora siya’g nag-orasyon.

Unya nadiskubrehan sa mga paryente ug silingan ni Albert nga duna siya’y healing touch. Bisa’g unsay balatian sa tawo, kun iyang masahian ang tibook lawas, mahupay. Usahay, bisa’g nagtrabaho siya sa bupete, apason siya’s mga paryente kay magpamasahe. Ang tinood, nakabasa lang si Albert og pangadyeon sa Pranic Healing. Gigamit lang niya usa ka higayon sa iyang amahan nga gilabdan og ulo ug gihilantan. Nainila na hinoon siya nga faith healer nga law student.

Pag-adto ni Albert sa Manila aron mokuha og bar exams, gimingaw niya iyang mga tinambalan. Apan nakatabang sila, kay nag-amot-amot og salapi aron idugang sa iyang bawon nga salapi. Kay di lalim ang mopuyo og Manila nga way paryente. Wala na mahadlok si Albert kun di siya kapasar sa bar exams. Kay makakuwarta na man siya’s iyang panambal. “Kun di maabogado, maalbularyo. Kay daghan naman kong orasyon nga Latin” niya pa sa iyang kaugalingon. (Kataposan)