Jezebel

“Nindota nimo, Jezebel, uy,” ni Edward pa nga naghangos sa kakutas.

Wala ko motubay sa iyang gisulti.

“Sayon ra man diay ilaron ang imong landlady,” nagkanayon si Edward. “Nagtuo gyud intawon siya nga managsuon tang duha.”

“Bitaw,” nako pa. “Nadala gyud siya sa atong drama.”

“Ayohon lang gyud nato’g dala ang atong papel aron dili ta mabuking.”

“Mao gyud kay kun mabuking ta, tingali’g mosumbong siya sa akong mga ginikanan. Iya ra bang gikuha ang mga ngalan sa ginikanan ug address sa tanang boarders.”

“Mao na lang ning paagiha ang atong buhaton kanunay. Kun may lugar ko, moanhi ko sa imong boarding house. Ug kun ikaw ang makahigayon ikaw ang moadto sa akong boarding house. I-atol lang nga wa koy klase aron makalugar ta’g maayo.”

“Sige.”

“Ugma, bakante ko sa udto. Diyotay ray boarders sa akong boarding house kun udto. Paaboton ko ikaw.”

Nianang pagkaugma sa udto, segun sa gikasabotan namo ni Edward, miadto ko sa iyang boarding house. Gisugat ko niya sa gawas ug nagkuyog mi paingon sa sulod.  -  Sumpayan pa