Usa diay ka lamat

Sunod semana ang kasal nila ni Joselito ug Ines. Gani naghinamhinam na ang duruha. Sa wala pa ang ilang kasal niadto sila sa kalasangan dala ang ilang kagamitan sama sa gapasan sa pana, pagkaon ug tubig. Unya gibati’g kakulba si Ines.

“Joselito, moadto ta sa kalasangan nga kaslonon man ta! Ug ang atong adtoan gidungog man nga adunay nagpuyo nga dili ingon nato!” ni Ines.

“Ines, dili ko motuo og dili ingon nato! Mao nga moadto gyod ta!” ni Joselito.

Sa didto  na sila sa kalasangan abtik kaayo si Joselito nga nikuha sa gapasan sa pana kay may nakita siyang baboy ihalas. Ug iya lang sab gibilin si Ines sa taw-an nga dakong kahoy. Unya gibati og  kahadlok si Ines kay siya na lang usa ang nahibilin. Unya sa tanto niyang paglingilingi nahipugwat siya tungod kay nakita niya sa unahan ang talagsaong bato nga porma gayod sa tawo. Sa hunahuna ni Ines nga ang bato nga porma gayod sa tawo gisilotan sa engkanto, kay nakasala. Unya may lain na sab siyang nakita nga usa ka dakong langob kilid sa iyang nahimutangan. Ug adunay nagpasad nga mga kalabera sa tawo.

Apan sa kalit lang may higanteng mananap nga niguho gikan sa dakong langob. Nahaigking si Ines, kay ang niguho usa ka higanteng mantaga nga buot motukob kaniya. Mao nga nidagan siya ug iyang gipangita si Joselito.

Sa nahimutangan ni Joselito pakyas siya sa pagkuha sa mananap tungod kay kusog kaayo nidagan ang baboy ihalas nga iyang gigukod. Apan sa wala damha may lain siyang nakita nga baboy ihalas ug iyang gitirahan ang maong mananap. Unya puwerting igua sa lawas niini sa gapasan sa pana. Ug sa kalit lang naglango lango nga nibakho sa paghilak si Joselito, kay ang iyang gitoohan nga baboy ihalas mao man diay si Ines nga iyang hinigugma.

“Ines, pasayloa intawon ko! Nasayod ka nga gimahal tika! Dad-on tika sa tambalanan aron maatiman ka sa mga doktor”, ni Joselito nga ningaab sa paghilak.

“J-o-se-l-i-t-o ... w-a-l-a-y ... k-a-p-u-s-l-a-n-a-n ... kay m-a-m-a-t-a-y ... n-a-k-o ... a-y-a-w ...p-a-g-h-i-l-a-k ... n-a-k-a-s-a-b-o-t ... n-a-k-o ... k-a-d-t-o-n-g ... m-a-n-a-n-a-p ... s-a i-m-o-n-g ... p-a-n-a-n-a-w... n-g-a ... m-a-o ... a-k-o. ... u-s-a ... d-i-a-y ... k-a ... l-a-m-a-t!”, ni Ines dayong bugto sa iyang kinabuhi. (Katapusan)