Jezebel - Gula 66

Nagdalidali ko’g areglar sa kaugalingon ug miadto sa eskuwelahan. Maayo gani kay wala pa mahiabot ang among instructor. Nakaginhawa gyud intawon ko’g luag.

Nianang pagkagabii, human sa kataposan kong klase, mitingog ang message alert tone sa akong cellphone sa akong paggawas gikan sa classroom. Akong gisusi. Si Edward diay ang nag-text. Nagpahibalo siya nako nga naghulat na siya nako sa Agora.

Gitubag ko ang text ni Edward. Giingnan ko siya sa text nga nagpadulong na ko sa Agora.

Human nako ma-send ang akong reply kang Edward, nagdali ko’g gawas sa lobby sa eskuwelahan ug midiretso sa Agora. Nagkita dayon mi si Edward. Siya’y nag-order sa among panihapon. Nangaon dayon mi pag-abot sa among gi-order.

“Kanus-a ko nimo paadtoon sa imong boarding house?” Gipangutana ko ni Edward samtang nagpadayon mi sa pagpangaon.

“Ayaw una karon,” matud ko. “Maniid una ko didto kun puwede bang makasulod sa among boarding house ang lalaki. Pulos babaye man gud mi didto.”

“Sige. Ingna lang unya ko kun puwede.”

“Sure.”

Human sa among panihapon, mopauli na unta ko apan gipugngan ko ni Edward. Gidala ko niya sa usa ka motel. -- Sumpayan pa