Tag-an sa horoscope

Alas 6:30 sa buntag. Nigawas si Ernie sa Macdo, Escario kay off-duty na siya pagkasekyu. Girelibohan siya ni Bobby. Samtang naglakaw siya buyon sa Shell Gasoline Station sa Escario, may lalaki nga nilabang gikan sa Jollibee ug nakatupad niya’g lakaw.

“Asa man diay ka, sir?” sukot ni Ernie. Gipakig-istoryahan niya kay mora’g nasinati niya ang tawo. Morag tigkan-anan sa Macdo.

“Adto’s eskina Gorordo. Kay mopalit ko’g Banat News” sa tawo. Nagkawo siya’g baseball cap. Nag-shades. Di matataw kun batan-on o guwang ba siya.

“Maglakaw lang ka?” ni Ernie.

“Dalang exercise. Kining tiguwang na ta, nagkinahanglan man og exercise. Wa na diay ka magsekyu sa SDA?” sa tawo. Nitan-aw ni Ernie.

Karon pa siya kaamgo nga dili diay sila kaila. Naa ra ang SDA atbang sa Kapitolyo. Apan wa man siya naasayin didto sukad siya nasekyu.

“Sa Macdo ra man ko nagsekyu. Pero off-duty na ko ron” ni Ernie. Gitubayan na lang niya’g istorya ang tawo. Kay makighinabi man sab. Ug medyo mahigalaon. Nagtupad lang gihapon sila’g lakaw. Dapit sa wala si Ernie.

“Asa man diay ka uli?” “Sa Kamputhaw?” Tungod na sila sa skywalk sa Escario. “Purok 8?” “O”.

“Naa kay silingan dihang Panilagao o Tan?” “Wa pa koy kaila diha. Bag-o pa man ko’s akong gipuy-an. Ferrer ang apelyido sa tag-iya sa balay akong gipuy-an”. “Kanang mga Ferrer naa sa Carmen, Dumanjug ug Pusok, Lapu-Lapu City.”

“Mao ba?” ni Ernie. Nahibulong siya nga suheto ang tawo.

“Pero dili tanang tawo nga pareho’g apelyido mag-ilhanay nga kadugo. Naa man gani magminyoay nga pareha’g apelyido. Usahay dili na nila masubay. Unya ang mga pobre molikay sa datung paryente. Kay maulaw mamaryente. Ang mga datu sab, di kaayo managad sa mga pobreng kadugo” sa tawo.

“Ingon diay ana, sir?”

“Bisa’g unsa pang apelyidoha. Hasta ang mga Manto. Bisa’g magsige sila’g reunion, katag man gihapon. Kay ang mga datu lai’g pundok. Ang pobre lain sab.”

Niabot sila sa dalan  likoan ni Ernie padulong sa Purok 8. “Mobuwag na lang una ko nimo sir” ni Ernie.

“Sige. OK lang. Sa sunod na sab natong panagkita” sa tawo. Niyango ug nipahiyom ni Ernie. Nipadayon og lakaw padulong sa eskina Gorordo ug Escario.

Sa pagliko ni Ernie sa wala nahinumduman niya ang horoscope iyang nabasa sa Banat News ganihang sayong buntag sa diha pa siya’s Macdo.

“Makahimamat ka og manggialamon nga tawo” matud sa Zodiac sign nga Sagittarius. Dako niyang kahibulong. Ug nakahukom siyang iyang ilailahon ang tawo sa sunod nilang panagkita. (Katapusan)