Budhi

Nahaulpot si Ernie, alyas Kumander Tigre, dihang pagkuyanap gayud sa kahayag sa banagbanag, milanog ang kusog nga singgit gikan sa usa ka loudspeaker, gikan sa dakudako sa mga sundalong militar nga naglibot na diay sa ilang  kuta, taliwala sa dakong lasang sa bukid. Abtik nga migunit sa ilang mga garan nga riple ang 30 niya ka sakop nga rebelde nga nakalitan.

“Kumander Tigre! Ayaw gayud kamo pagpakita og pagsukol! Surender na lang kamong tanan! Gilibotan na kamo sa usa ka batalyon nga sundalong militar....!”

Abtik nga gibuwanit ni Ernie ang iyang baby armalite nga nagtangag sa magasin sa mga bala ug milingi sa iyang pangabaga nga si Ka Israel nga naggunit usab sa iyang kalibre .45 nga armas-de-fuego.

“Dunay nagbudhi sa atong mga sakop, Ka Israel! Natultolan ang atong kuta sa mga sundalong militar! Mosukol ta...!”

Igo lang nga naglingolingo si Ka Israel nga mitutok kang Ernie.

“Gilibotan na ta sa mga sundalong militar dinhi sa atong kuta sa bukid, Kumander! Wa nay kapuslanan nga mosukol ta! Mamatay tang tanan!”

“Maoy kawsa natong mga rebeldeng NPA nga mosukol gayud, hangtod sa katapusang tinulo sa atong dugo, Ka Israel! Mga sakop, mosukol ta!” singgit ni Ernie ngadto sa iyang mga sakop.

Apan wala’y naggunok sa 30 ka mga sakop ni Kumander Tigre. Hinuon, giitsa nilang tanan ang gikuptan nilang garan nga riple sa yuta. “Kumander, panahon na nga mobalik tang tanan sa sabakan sa balaod! Naghulat si Coronel Meloy sa atong pagsurender ning sayong banagbanag!” pintok nga namulong si Ka Israel.

Nahalingi si Ernie sa iyang pangabaga ug gitutokan si Ka Israel.

“Klaro nga ikaw ang nagbudhi sa atong grupo, Ka Israel...!”

“Oo, Kumander! Ang atong mga sakop gusto na sab nga magpuyo ta’s kahayag nga dili magtagotago sa kangitngit ug magbag-o na sa kinabuhi, human sa daghang katuigan  nga pagtagotago ta dinhi sa bukid...!”

Hugot nga gitutokan ni Ernie si Ka Israel. Unya, giitsa niya ang iyang baby armalite sa yuta, samtang nanggawas na ang daghang mga sundalong militar gikan sa ilang gitagoan, aron sa pagdakop sa tanang mga rebelde niadtong orasa. (Kataposan)