Jezebel
Nahuman gyud ang akong pagpa-enroll sa alas 10:00 sa buntag. Kay may panahon pa man, nangita ko’g boarding house. Maayo gani kay nakakita dayon ko’g bakante nga duol ra sa eskuwelahan. Nakauyon ko sa puwesto. Ako rang usa sulod sa private room nga pang-single.
Human sa akong pagpakigsabot sa tag-iya sa boarding house, miadto ko sa labing duol nga department store. Dakodako pa ang kantidad nga nahibilin sa kuwartang gihatag ni Tatay Metodio nako alang sa pagpa-enroll. Nakahunahuna ko nga mamalit og mga gamit nga personal ug alang sa eskuwelahan. Mipalit sab ko’g cellphone.
Hapit na ang alas dose dihang nahuman ko’g pamalit. Migawas ko sa department store. Milabang ko sa karsada kay didto sa atbang nahimutang ang outlet sa Jollibee. Misulod ko sa maong fastfood outlet ug namili og pagkaon nga orderon. Dihang milinya na ko sa counter, may mikuhit sa akong bukton gikan sa akong luyo. Si Edward!
“Magdungan na lang ta’g kaon,” niya pa.
“Sige, nako pa. “Unsay gusto mong orderon?”
“Kun unsay imo, mao na lang say ako.”
“Okey. Pangita na lang og bakanteng lamesa.”
“Sige,” dayong biya ni Edward sa akong nahimutangan.
Human ko maka-order, miduol ko ni Edward nga naglingkod atubangan sa lamesa nga nahimutang sa suok nga bahin sa kan-anan. (Sumpayan pa)
- Latest
