MCLE compliance

Aron dili makadungog ilang mga kliyente, giagni ni Judge Amorsi ang duha ka nag-atbang nga abogado nga adto sila sulod sa chambers magkomperensiya. Pre-trial conference ang schedule sa ilang kaso karong buntaga. Apan dunay panagbangi ang duha ka abogado mahitungod sa MCLE Compliance. Ang MCLE kon Mandatory Continuing Legal Education, gimando sa Supreme Court nga tambongan sa mga abogado kada tulo ka tuig ug mohuman gyud og 36 units.

Karong panahona, ang mga nakatambong nga abogado nga kompleto, duna bay ika-lima kon fifth compliance. Lima na ka 36 units. Si Atty. Jessie Sukdip wala pa bisa’g first compliance 80 na iyang edad. Si Atty. Manny Agbon duna nay certificate of fifth compliance. Gipatik niya sa complaint sa kaso nga iyang gipirmahan. Way napatik sa Answer nga gipirmahan ni Atty. Sukdip mahitungod sa MCLE. Ang balaod sa Supreme Court mao nga dili ipadawat sa husgado ang pleading nga wala’y nabutang nga MCLE Compliance.

“Akong gi-deny ang motion ni Atty. Agbon nga i-reject imong Answer. Kay giamendar na man ang balaod sa Supreme Court. Karon, ang abogado na mismo ang kastigohon.

Way labot iyang kliyente. Either suspensuhon siya ug pamultahon” ni Judge Amorsi dihang nahiluna na sila sulod sa chambers. “Unsa may hinungdan nga wa ka man katambong og MCLE Seminar, Atty. Sukdip?” dugang sa huwes. “Nasakit man gud ko, Judge. Naoperahan ko’g kidney ug by-pass sa kasingkasing” ni Atty. Sukdip. “Di na lang ko moinsister nga i-sanction siya, judge. Dapat mo-apply na lang siya’g MCLE exemption. Kay dugay man siya sa government service” ni Atty. Agbon. Ang iya untang giapas nga modaug siya’s kaso. Kay ma-default man unta ang kontra sa iyang kliyente, kun matangtang sa records ang answer. Apan nausab man ang balaod.

“O, nakadungog ka’s imong kompanyero? Gikalooy ka niya. Busa, lakawa imong exemption” sa huwes. “Salamat kompanyero” ni Atty. Sukdip. Nilamano ni Atty. Agbon. Nagpahiyomay sila. “O. Sige. Manggawas na ta. Unya i-schedule una nato ang mediation sa di pa mag-pre-trial. Basi’g magkaareglo mo” sa huwes. Nagpahiyom sab. Nanindog silang tulo. (Kataposan)