Ang gidangatan ni Carlito

Nahibulong si Roger nga way Carlito nga misugat sa iyang pag-abot karong adlawa. Nabatasan na sa iyang suod nga higala nga mosugat matag bakasyon niya. Gimingaw si Roger sa ala Tom Jones nga tingog ni Carlito samtang mag-inom sila sa kinaham nilang “pulang kabayo.”

“Wa man siguro ganahi si Carlito, sa ako karong pagbakasyon bay Jun?” sukna ni Roger ngadtong Jun.

“Ganahan kaayo na si Carlito, bay Roger, kun ania ka, wa lang siguro makuha sa iyang radar ang imong pag-abot,” tiaw ni Jun nga nagkatawa.

Lapoy ang kalawasan ni Roger sa biyahe niya gikan sa Manila sakay sa ferry boat. Apan naghuros-huros iyang kahinam nga makita ang iyang uyab nga nagtrabaho sa videokehan ni Carmen isip cashier nga nahimutang sa barangay San Roque.

Nalipay si Roger ug Jun nga sila pang duha ang nagtikaw-tikaw sa videokehan ni Carmen. Human mahimamat ni Roger  ang iyang uyab nga si Nene, gisugdan dayon nila ang pagdimdim sa bugnaw nga “pulang kabayo.”

“Unsay inyong kantahon, kay akong ilista?” sukna ni Nene sa duha.

“Unya na, Ne, painiton usa namo, ang makina,” tubag ni Jun.

Gibati’g dakong kahaw-ang si Roger nga wala si Carlito sa ilang pag-inom. Malingaw siya sa mga pasiaw ug nindot nga tingog ni Carlito. Mawala iyang problema. Higpit ang oras sa opisina nga iyang gitrabahoan didto sa Manila. “Day Nene, silingan man mo ni Carlito, aduna kay kasayuran niya?” pangutana ni Roger sa kabalaka.

“Abi nako’g nahibawo ka, Ger, atua na siya mopuyo sa balay nilang Sonia, sa pikas nga barangay,” pasabot ni Nene.

Miulbo ang kalagot ni Roger. Aduna sila’y kasabotan nga magpahibaw-anay kun kinsa nilang tulo ang gustong magminyo. Pinaagi sa gahom sa “pulang kabayo” gipanumpaan nilang Roger, Jun ug Carlito nga tumanon ang ilang saad. Apan nalusaw ang kasuko ni Roger dihang mitungha si Carlito.

“Miluib man ka, sa atong gikasabotan, Bay Carlito, wa man mi nimo pahibaw-a nga magminyo ka,” sukmat ni Roger.

“Bay Ger, di pa unta ko gustong magminyo pero nasakpan mi sa inahan ni Sonia, didto gyud sa iyang lawak. Posas akong naangkon,” ni Carlito.

Nakasabot silang Roger ug Jun sa gidangatan ni Carlito. (Kataposan)