Mahigalaon sa chicks - Gula 3

Dali ra g’yud kaayo nga nagkasuod sila si Elmer ug Grace. Nakumbinsir g’yud ni Grace ang ulitawo nga motambong sa bisperas sa ilang pista sa Barangay Hingatmonan.

Giingnan ni Elmer si Grace nga moapas ra siya paingon sa Hingatmonan kay mopauli usa siya sa ilang balay sa Barangay Poblacion. “Ah, basin og dili ka moadto, uban na lang ko sa inyo aron magkuyog na lang ta sa amo,” matud ni Grace.

Nasabot ni Elmer nga tininuod gayud ang pagdapit ni Grace kaniya nga patambongon sa kalingawan atol sa bisperas sa ilang pista. Dunay disco nga ipahigayon human sa pangadye sa kapilya.

“Dili kaha ko kontrahan didto sa inyo Grace? Ang imong boyfriend, dili kaha masuko nga may kauban ka nga lalaki?” gisukna ni Elmer ang dalaga. “Walay makabinuang nimo kay makatilaw sila sa ig-agaw nako nga polis,” dali nga pasalig ni Grace kang Elmer.

Tuod, igo lang mihapit si Elmer sa ilang balay ug nananghid sa iyang inahan nga mamista sa barangay nila ni Grace. “Sigi Elmer, pag-ayo-ayo didto ha kay daghan ra ba nga mga init og ulo diha sa Hingatmonan,” matud sa iyang inahan.

Ngitngit na. Gikan sa Poblacion mosakay pa og habal-habal sila si Grace ug Elmer paingon sa Hingatmonan. Samtang nagbarog sila daplin sa karsada, adunay usa ka motor nga mihunong.

“Ihatod mi sa Hingatmonan,” giingnan ni Elmer ang nagmaneho sa motor nga igo lang miyango. Una nga misakay si Elmer sa motor ug milingkod luyo sa drayber, dayon si Grace miangkas luyo kaniya.

Wala damha ni Elmer nga dihang misugod na pagpadagan ang drayber, kalit lang nga migunit si Grace sa iyang hawak. Naniguro tingali ang dalaga nga dili mahayang kun moarangkada na pagpadagan ang drayber.

Gibati og kalalim si Elmer nga nabag-id sa iyang sampot ang atubangan nga bahin ni Grace samtang paspas ang dagan sa motor. (Sumpayan)