Sa unang panagkita

Kaslonon na si Glen ug Patty. Nia na sila sa pultahan sa simbahan ning sayong kahaponon. Kinse minutos na lang, mopaso na sila. Gihan-ay na ang wedding entourage sa wedding coordinator. Unya, samtang nagtupad og barog, nagkatinan-away sila. Nagtinotokay. Ug nangatawa sila.

“Nganong nagkatawa man ka?” ni Patty.

“Nahinumdum lagi ko sa una natong panagkita. Ikaw?” ni Glen.

“Mao sab akong nahinumduman” ni Patty. Tulo ka tuig silang uyab.

Abogado si Glen. Lima ka tuig pa siyang nanglaban. Usa ka buntag nga padulong siya sa iyang opisina sa Paknaan, Mandaue, nagmaneho sa iyang Honda Civic nga pula, naagian niya si Patty nga nagbarog sa karsada. Di pa sila kaila adtong higayona. Aw abi lang ni Glen og kaila na sila. Gihunongan niya si Patty.

“Asa man ka?” ni Glen.

“Adto’s Pacific Mall” ni Patty.

“Dali. Sakay diri. Moagi man ko didto” ni Glen. Nisakay si Patty. Nilingkod sa front seat. “Kumusta na man imong mama?” ni Glen, nipaarangkada sa kotse.

“Naa gihapon. Naghinayhinay sa iyang dress shop” ni Patty. “Imong papa. Di ba pastor man imong papa?” ni Glen.

“Di man. Seaman man si papa. Sigi pang biyahe” ni Patty.

“Sorry, ha. Di man diay ta kaila. Abi nako’g anak ka ni Mrs. Ramirez, akong kliyente” ni Glen.

“Di diay ka si Atty. Bontuyan, abogado ni mama sa iyang kaso sa yuta?” ni Patty.

“Dili. Si Atty. Carreon ko. Ihunong ta lang una kas daplin. Kay mahadlok ko’g makasuhan og sexual harassment,” ni Glen. Maulawon.

“Ah, sigi,” ni Patty. Nipahiyom og hilaw. Nanaog sa kotse.

“Kun magkita ta’g usab, puwede na tika pasakyon. Unya mag-ila-ila ta. Di lang ron, kay puro man ta nasayop nga abi man nato og kaila na ta daan” ni Glen. Nipadagan.

Dangta’g usa ka semana, naagian na sab ni Glen si Patty sa karsada. Gipasakay na lang gyud niya. Diha na sila nag-ila ila. Gihatud si Patty sa Pacific Mall diin promo girl siya didto.

Ug nadungog nila ang bagting sa altar. Mopaso na sila. “Naa koy ikumpisal nimo” ni Patty sa pagsugod nila’g paso.

“Unsa man?” ni Glen.

“Wa koy kailang Atty. Bontuyan” ni Patty.

“Mao ba?” ni Glen.

“Wa man sab koy kliyenteng Mrs. Ramirez” ni Glen. Nagkinataw-anay na sab sila. Nag-apir. 

Nahimuot ang mga tawong nakakita sa kaslonon nga mora la’g managhigala.

“Para gyud diay tas usa’g-usa” nagkadungan sila’g sulti. (Katapusan)