Uhong

Maoy pagtuang sa habuhabo ning buntaga, nga kaganiha ginuntan sa kilat ug dugdog. Nasiklapan ni Denis nga lingang nagdigamo ang iyang Nanay Toria sa paglung-ag og kan-on sa ilang abohan, samtang iyang Tatay Virgilio, naghuwad sa gisag-ob nga tubig sa ilang banga sa kusina.

Abtik nga mikango si Denis sa ilang natad ug way lingilingi nga mipadulong ngadto sa unahan aron dumdumon ang bungdo nga tugkanan og uhong sa kilid sa punoan sa lubing limbaon sa ilang uma. Tungod sa pagpanugdog ganina, naseguro ni Denis nga duna gyuy mga uhong nga miturok ning buntaga.

“Huwebes ron! Wala na sab koy ikabawong sud-an sa bawon kong kan-on nga puston sa dahon sa saging! Unsaon, kutob man lang sa Miyerkules ang kaling nga buwad nga komprahon ni Nanay sa tiyanggihan sa baryo...!” nagkitabkitab ang baba ni Denis nga naghunahuna sa iyang pag-eskuyla ning adlawa sa publikong hayskol nga eskuylahan sa ilang baryo nga mona’s ginhawang mogradwar na siya sa 4th year high school ning tuiga.

Bugtong siyang anak sa iyang Tatay Virgilio ug Nanay Toria, ang kabos niyang mga ginikanan nga nabuhi sa panguma sa ilang baryo. Kun ting-uhong, sagad nga sud-an ni Denis sa iyang pag-eskuyla mao ang sinugbang uhong. Maoy naabtan ni Denis si Jeny nga nag-una pa niya didto sa bungdo nga tugkanan og uhong. Si Jeny mao ang iyang katalirungan sa ilang baryo ug klasmeyt niya sa 4th year high school. Sa edad nga 15, hilom nga nagkauyab sila si Denis ug Jeny. Si Jeny, bugtong usab nga anak ug anak  sa kabos nga mag-uumang mga ginikanan. Nagpahiyom si Jeny nga mitutok kang Denis. Nagkupot ang dalagita og lima ka buok uhong.

“He-he-he! Naunhan tika sa pag-ibot sa nanurok nga mga uhong, Dens!” “Bitaw, wa sab diay kay ikasud-an rong adlawa sa bawon ngadto sa atong eskuylahan, Jen....?”

“Wa lagi, Dens! Saon, hutdan naman sab sila si Papa ug Mama sa kinompra nilang kaling...! Lami ning uhong isugba, morag unod sa manok! Ato lang ning bahinon ang mga uhong, Dens....!”

“Sige, Jen! kining uhong, maoy timaan sa kabos tang gugma, Jen...!”

“Bitaw, Dens! Kinahanglan nga magsaaray ta, nga maningkamot gyud ta’g eskuyla sa paglampos sa kolehiyo, aron mahaw-as ta’s kakabos ugma damlag!”

“Husto ka, Jen! Aron dili na uhong ang atong isud-an, kun dili fried chicken ug litsong baboy na damlag....!” Malipayon nga nagkuyog sa pagpanglakaw ang duha ka kinse anyos nga nagminahalay nga nagbitbit og mga uhong. (Kataposan)