Mahigalaon sa chicks

Napugos si Elmer pagkatkat sa bentana sa bus aron lang g’yud siya makasakay pauli sa ilang lungsod sa Balamban. Sagad g’yud basta hapon na unya adlaw’ng Sabado mag-ilogay na ang mga pasahero sa pagsakay.

Mga batan-ong lalaki ang sagad nakapahimutang dayon og lingkoranan kay abtik man sila nga mikatkat agi sa bentana sa bus. Naglingkod na si Elmer apan nakita niya nga didto sa pultahan sa bus, padayon pa nga nag-ilogay ang mga pasahero kinsa ang una makasulod.

Nakabantay si Elmer nga adunay babaye nga nagkabiba og bag nga nagpanglantaw sa bus nga gitapuk-an sa mga pasahero. Nasabot ni Elmer nga ingon sa naguol ang babaye ug iyang nasabot nga mosakay tingali unta ang maong babaye. Nahuna-huna ni Elmer nga wala na ra ba’y laing sakyanan nga mobiyahe paingon sa Balamban kay last trip na ang iyang nasakyan. Naghangad-hangad ang babaye sa bus. “Balamban ka paingon miss?” gitagad ni Elmer ang babaye.

Miyango ang babaye nga mitan-aw ni Elmer. “Wala nay kalingkuran diha no?” gipangutana sa babaye si Elmer. Naluoy si Elmer mao nga nakahuna-huna siya nga ang babaye maoy iyang palingkuron.

“Dali, ambi ang imong bag kay ikaw ang akong palingkuron diri sa akong gilingkuran,” ni Elmer pa. Gitunol sa babaye ang iyang bag. Midali ang babaye pag-adto sa pultahan. Diha nga nalinaw-linaw na, nakasaka na usab ang babaye.

“Asa man ang imong lingkuranan day?” matud sa konduktor nga nangutana sa babaye. Midali pagtindog si Elmer pagkakita sa babaye. “Magtindog na lang ko miss, ikaw ang lingkod sa akong lingkuranan,” matud ni Elmer.

“Salamat kaayo ha?” sa babaye pa. Taud-taod, mibiya na ang bus gikan sa south bus terminal. “Ako lang sabakon ang imong bag para dili ka lisod sa imong pagtindog,” tanyag sa babaye ngadto ni Elmer. (Sumpayan)