Masuko pangutan-on

Dear Tita Salie,

Hello! Good day. Usa ko ka minyo, kasado gyud sulod na sa walo ka tuig, dunay anak usa ug duna koy negosyo.

Nagsugod ang akong problema dihang nakatrabaho ang akong asawa. Masuko man gud siya, Tita Salie, kun mangutana ko niya. Sama pananglitan sa oras nga iyang igawas. Mo-out siya’g alas 5:00 sa hapon apan muabot siya sa balay alas 8:00 na sa gabii. Masuko siya kun mangutana ko ug iya kong ingnon nga wala koy labot niini.

Dihay kausa nga dunay nanawag kaniya nga usa ka lalaki, nagduda gyud ko, Tita Salie. Dihang akong gitan-aw ang iyang cellphone dunay daghang pangan sa lalaki ug matud niya mga kauban niya sa trabaho.

Ako siyang giingnan nga ipa-delete, nasuko man hinuon mao nga midako ang among away ug nasikaran ko siya. Mitawag siyag polis ug iya kong gipadakop.

Unsa may ipasabot niini, Tita Salie? Duna ba siya’y lain? Palihug pasabta ko. Thank you so much.

* * *

Hi! Good day. Alang kanako, dili gyud maayo ang gibuhat sa imong asawa. Bisan kun duna tay katungod or “Right to privacy” apan minyo siya ug asawa siya nimo ug dapat lang nga mosulti siya kanimo mahitungod sa iyang trabaho. Ug dili siya angay masuko tungod kay natural lamang kini sa magtiayon. Kun nakasabot siya og unsay kaminyoon.

Estoryahi pag-ayo ang inyong problema pinaagi sa pagkamabugnawon ang ulo. Dili maayo nga imo usab siyang pasakitan pinaagi sa kulata o ‘patid’ kay dili kini makatabang sa inyong problema, hinuon, makapasamot pa kini sa kabati sa inyong pagpuyo. -- Tita Salie