Tigkuha
Paglingkod ni Rito sa iyang computer table, nakurat siya. Wala na ang gilaundok niyang sensilyo ibabaw sa lamesita tupad sa iyang nahimutangan. Tag 10 ngadto sa P1 ra hinuon ang maong mga sensilyo. Pero, daghan! Hain man diay? Naurong iyang panghunahuna dihang may mihikap sa iyang bukobuko -- si Tita, iyang asawa.
“Uy, Rits, ako diay’ng gihipos imong mga sensilyo kay dinhi si Laglag. Basig hutdon unya niya’g kuha. Pilit ra ba kana’g kamot.” Tug-an sa nagpahiyom nga babaye.
Si Laglag, anak sa igsuon ni Rito. Mao ni tiglimpiyo sa iyang Fortuner kada Sabado, diin suholan niya’g P200 dalang kapin aron may mabalon kini sa mga adlaw nga tingklase. Grade 6 na si Laglag. Pero dakoon ug bayongbayong na ang pamarog niini. Namatikdan sa tibuok pamilya, nga kon moanha gani si Laglag sa ilang balay, mawala gyod ang mga sensilyo nga ilang ibutang sa bisan asang tungtonganan.
Wala hinuoy nakakita kon si Laglag ba ang tigkuha sa sensilyo. Igo ra sila sa duda. Pero si Rito, kinsa usa ka lay minister, wa gyod magduda nga si Laglag hilabtanon? Ngano? Tungod kay wala man gyoy nawala sulod sa sakyanan kada panglimpiyo ni Laglag. “Unya, Tits, hain man nimo ibutang ang mga sensilyo?”
“Ay, tua gisulod nako’g tray. Atua ilawom sa atong kama.” Tug-an ni Tita. Unya, nananghid: “Naa...sige, biyaan sa tika. Kay ipaluto ko pa sa kusinera kining akong kinompra.”
Giadto ni Rito ang dapit nga gibutangan sa mga sensilyo. Iyang giihap. Nainat iyang kilay dihang wala na diha ang tibuok tag P10 ug tag P5. Pagka daghan ra ba adto! Pastilan, tag P1 na man lay nahabilin? Tinuod kaha ang gisulti sa iyang misis nga si Laglag hilabtanon? Midalikyat siya’g adto sa kusina ug gipangutana si Tita kon wala ba kini manguha’g sensilyo?
“Aw, akong gikuha tanang tibuok P10 ug P5 kay giplite nako sa taksi.”
Gumikan sa maong tubag nasolido ang panan-aw ni Rito sa tinuoray’ng pagka tawo ni Laglag. Karon, nakaseguro na siya nga si Laglag dili mao ang tigkuha sa iyang mga sensilyo. (Kataposan)
- Latest
