Bunga sa kalooy

Gula 2

Standby area ba ninyo ang Juana Osmeña kada gabii?”  unang pulong nga giluwatan ni Ronnie ngadto kang Star samtang nagdagan ang kotse nga iyang gimaneho paingon sa usa ka motel sa Happy Valley sa V. Rama.

“Bag-o pa ko diha sa Juana Osmeña. Sa Kamagayan man g’yud ko mag-standby sa gabii uban nila ni Faith ug Cynthia pero kay gibungkag man ang kabalayan didto namalhin lang usa mi,” pasabot ni Star.

Karon nasabtan na ni Ronnie nga si Star sakop diay tingali sa grupo  nga NABUSOG kun Nagkahiusang Burikat sa Sugbo kang kansang mga sakop anaa mag-operate sa Barangay Kamagayan panahon sa gabii.

“Luoy tawon mi kaayo kay nagkatibulaag mi dihang gipangguba ang among kasa. Ang uban nako nga kauban mibalhin sa Greenhouse diha sa Echavez pero puno na man sila didto,” matud ni Star. Nasabot ni Ronnie nga buotan si Star nga pagka babaye. Hinayon kini nga manulti ug dili sama sa ubang mga nahimamat niya nga babaye’ng nagbaligya sa ilang dungog nga mga kiat.

“Taga diin ka diay Star?” gisukna na usab niya ang babaye. Nasayran ni Ronnie nga taga Mindanao gayud si Star ug nahipunta lang dinhi sa Sugbo upat ka buwan pa ang milabay kay gibiktima siya sa mangingilad niya nga silingan.

Mitug-an si Star nga gipatuo siya sa iyang silingan nga nindot ang trabaho nga ilang sudlan ug dagko og suweldo apan kasa diay sa mga babaye nga nagbaligya sa ilang kadungganan sa mga lalaki.

Wala makatingog si Ronnie sa iyang nasayran. Napalingi siya kang Star nga gibati og kaluoy sa babaye. Miabot na sila sa motel nga nahimutang sa Happy Valley.

Gideritso pagpasulod ni Ronnie ang iyang kotse sa bakante nga grahe ug abtik kaayo ang boy nga misirado dungan sa pagsinyas nga andam na ang kuwarto. (Sumpayan)