Chocolate - Gula 7
Wala gi-reply ni Larry ang text ni Charisse. Nagduda siya nga basin dili para kaniya ang maong message ug nasipyat lang ang dalaga, ilabi na nga dili pa kini bansay mogamit og selpon.
Pagkahapon, nahuman na g’yud ni Larry ang iyang gimbuhaton sa opisina. Nakaginhawa siya’g luag. Karon pa niya gitan-aw ang iyang selpon nga gituyo niya sa pag-silent sukad sa buntag.
May upat ka text messages gikan ni Charisse. Duha niini nangumusta kang Larry ug ang laing duha susama ang message “I miss you so much.” Nakapahiyom si Larry kay nakasiguro na siya nga para kaniya ang mensahe.
Nakahuna-huna si Larry nga i-surpresa niya si Charisse, pakalitan niya’g adto sa ilang balay. Apan mihapit usa si Larry sa department store ug mipalit og tulo ka chocolate nga igasa niya sa dalaga. Nasayod siya nga kinaham sa dalaga ang chocolate. Diha na sa atubangan sa balay nila ni Charisse apan giteksan niya ang dalaga ug gipangutana kon naa ba siya sa balay. “Dia ra, ako ra usa, mingaw,” ni Charisse. Gituktok ni Larry ang pultahan sa balay.
Pag-abli, nahingangha si Charisse. Nabasa ni Larry nga nalipay kaayo si Charisse nga nakakita kaniya. Wala kapugngi sa dalaga ang paggakos kang Larry. “Mingaw na g’yud kaayo ko nimo Lar,” ni Charisse.
“Ako ‘sab Char, gimingaw kaayo nimo,” matud ni Larry dungan sa pagtunol sa tulo ka chocolate ngadto sa dalaga. Milukso sa kalipay si Charisse sa tumang kahinangop ug migakos siya pag-usab kang Larry.
Wala usab tuyoa ni Larry nga nahagkan niya si Charisse. “Ay, sori kaayo Char ha nga nahagkan ka nako,” ni Larry. “No problem, ako pa gani ang mo-kiss nimo Lar,” matud ni Charisse dungan sa paghawok kang Larry.
Nagtinutokay silang duha ug wala lang damha nga daw nagkatagbo ang masi’g nila ka mga pagbati. Giukoban ni Larry ang mga ngabil sa dalaga samtang hugot kini niya nga gigakos. (Kataposan)
- Latest
