Sila’s Mr. & Mrs. Tinola

Kusinero si Jerry sa karenderya sa iyang uyoan nga si Tony. May suki sila nga babaye’g lalaki nga may kuyog batang babaye, nga otso anyos. Kon magtiayon ni sila, puwede kinamanghurang anak nila ang bata. O kaha kinamaguwangang apo. Kay guwangon na man sila.

Usa ka bulan na nga tigpamahawan sila dinhi. Tinola nga isda gyud ilang kaonon. Kay wa pa si Jerry kaila sa mga ngalan sa mga suki, ginganlan lang niya sila’g Mr. and Mrs. Tinola. Alas sayis i medya sa buntag kasagaran nilang iabot. Lunes ngadto sa Biyernes. Mo-parking sa atubangan sa karenderya sa dalan Ramos Ext. ilang kotse nga Toyota Corolla nga abuhon.

Bisa’g kusinero si Jerry, motabang usahay siya’g serbe og kustomer basta mingaw pa ang karenderya, unya kulang pa sila og selbedora kay wa pa nangabot. Usahay maserbehan niya sila. Maayo’g mga gawi. Mapasalamaton kaayo sila. Nakita ni Jerry nga pinangga kaayo nila ang batang babaye.

“Inyong kinamanghurang anak o apo?” ni Jerry usa ka buntag nga siya ang nakaserbe nila.

“Kinamaguwangang apo” sa babaye.

“Di man mosugot nga mobalhin og eskuyla sa Carmen. Kada buntag mi mogikan og sayo. Matulog na lang siya sa sakyanan” sa lalaki.

“Naa diay ninyo inyong apo?” ni Jerry. “Sukad sa nursery, kinder ug hangtud karon nga grade three na” sa babaye.

“Nganong sa siyudad man siya nagtungha nga tua man diay mo puyo sa Carmen?” ni Jerry.

“Gikan sa nursery pa siya, nag-abang man mi sa Guadalupe. Sa niaging tapos sa bulan sa Hunyo, namauli mis Carmen. Kay nang-retire na mi sa among trabaho nga magtutudlo. Di na mi kaapord sa abangan sa among gipuy-an kaniadto” sa lalaki.

“Ang iya diay’ng parents? Hain man?” ni Jerry.

“Among anak iyang inahan. Ipon sab namo’g puyo sa Carmen. Mga magtutudlo sa Carmen National High School iyang ginikanan. Duna nay ikaduhang anak babaye nga naa sa kinder. Mao na lay ilang giatiman. Kini si Fiona naanad na man namo. Gipiyal na lang nila ngari namo. Nalipay na lang sab mi” sa lalaki.

“Mas pinangga gyud kono ang apo kay sa anak” ni Jerry.

“Mao gyud” nagdungan ang babaye’g lalaki. Nakapahiyom ang bata.

“Jer, naay laing customer” gisampit si Jerry sa iyang uyoan. Kay may laing customer nga magpaserbe. Nahimuot kaayo si Jerry nga magsud-ong sa ilang kamapinanggaon sa ilang apo. (Kataposan)