Chocolate

Nanggawas sila si Larry ug Charisse sa department store. Mipalit si Larry og bag-ong simpak alang sa selpon nga iyang gihatag sa dalaga.

Si Larry ang mi-insert sa simpak ngadto sa selpon ug pagkahuman, iya kini nga gi-testing sa pag-text ngadto sa iyang selpon. Dayon gi-phone book ni Larry ang iyang numero sa selpon aron masayon lang kang Charisse ang pag-text kaniya.

Nanakay sila og taxi ug gihatod ni Larry si Charisse ngadto sa ilang panimalay sa Barangay Pasil. “Likod sa barangay hall ang among balay, dili na lang ko modapit pagpahapit nimo Lar kay mauwaw ko,” matud ni Charisse.

Wala na lang ‘sab manaog si Larry ug mideritso lang siya pagpauli sakay gihapon sa sama nga taksi. Nagpahatod na si Larry sa iyang gipuy-an sa Barangay Capitol Site. Gikapoy si Larry mao nga pag-abot niya sa ilang balay, gusto na siya nga matulog.

Mihigda si Larry apan may text siya nga nadawat. Gikan diay kang Charisse nga nagpasalamat kaniya ug mitug-an sa iyang grabe’ng kalipay. Pagka-ugma, sayo nga mibangon si Larry kay busy na sila niini’ng adlawa pagpangandam sa dakong kalihukan sa ilang kompaniya.

Isip operations in-charge, siya maoy gisaligan sa lainlaing kalihukan. Nakadawat og mga text messages si Larry gikan ni Charisse, ang uban dili dayon niya ma-reply tungod sa ka-busy.

Usa ka semana gayud nga busy kaayo si Larry.

Inigpauli niya, matulog ra dayon siya tungod sa kalapoy. Usa ka buntag sa iyang pagmata, nakita niya ang daghang text messages gikan ni Charisse. Usa sa mga text messages nakapadani kang Larry.

“I miss you so much. I had so many sleepless nights thinking of someone that I love.” Gianalisar ni Larry ang mao nga mga pulong ni Charisse. Gihuna-huna niya kon para kaha kini kaniya? (Sumpayan)