May armas na

Kinsa man kadto ka? ni Charlie ngadto sa batan-ong sekyu nga lalaki nga malipayong nisugat niya ug nagpasalamat sa iyang natabang.

Ning buntaga, nanaug si Charlie sa iyang kotse human naplastar niya aron matubilan og gasolina ning gasolinahan nga iyang giurongan. Nangita siya’g ihianan. Tungod sa iyang water therapy, kada 30 minutos kaihion siya. Nihapit siya dinhi aron patubil ug mangihi samtang padulong sa iyang opisina. Unya, gisugat siya sa sekyu nga mahinangpon.

“Si Rodel bitaw ko, sir. Kadtong imong gihinabangan og P1,000 para gasto sa papeles alang sa training nako pagka-sekyu” niya pa. Mapahiyomon.

Dugay gihapong nakahinumdom si Charlie.

“Asa man diay ka, sir?” ni Rodel.

“Mangihi ko” ni Charlie.

“Kuhaan tika’g yawe sa CR” ni Rodel.

“Ay na lang” ni Charlie kay mora’g katoltol siya’s komon nga ihianan. Pero pan-os gyud hinoon.

Apan namugos si Rodel. Nidalig kuha og yawe ug gitunol ngadtong Charlie. Gidawat na lang niya. Samtang nangihi siya sa bowl sa CR, gipuga niya iyang utok sa paghinumdum ni Rodel.

Usa ka CPA si Charlie. Si Rodel nagtrabaho sa carwash nga suki niya. Maayo motrabaho si Rodel. Dagko’g tip hinatagan si Charlie. Unya niabli si Rodel nga mohuwam og P2,000 kay magsekyu siya. Wa pahuwama ni Charlie.

Apan gihatagan niya’g P1,000. Upat ka tuig na ang nakalabay. Nalimot na siya ni Rodel. Wa na sab siya nagpa-carwash kay may bag-o siyang maid nga maayong molimpiyo og kotse. Sa nahinumduman ni Charlie, sa linghod nga pangidaron nga 13, si Rodel wa na sa ila. Kay nagbuwag iyang ginikanan. Nag-iyahay na lang silang mga anak og paningkamot sa kaugalingon.

“Salamat gyud kaayo, sir sa imong gitabang nako. Ilhon gyud to nakong utang kabubut-on sa tibook nakong kinabuhi” ni Rodel sa paggawas ni Charlie sa CR.

“Pagbinut-an gyud. Kay may armas na ra ba ka” ni Charlie. Seryoso.

“O, sir. Ang imong mga tambag ako gyung gituman. Maong nilampos ko nga nahimong sekyu” ni Rodel. “Sige, Rodel. Nalipay ko alang nimo” ni Charlie. Nibalik sa iyang kotse. (Kataposan)