Tipas

Kalit lang mitipas og laing dalan ang lima ka kaubang boarders ni Marman. Gikan silang nag-inom sa usa ka beerhouse sa downtown area sa siyudad ning gabhiona. Unang higayon nga wa siya makabalibad sa pagkuyog nilang Henry, Boy, Jimmy, Edgar ug Nelson nga magtampotampo sila sa pag-inom og beer.

Ang lima pulos niya kaubang mga estudyante sa usa ka unibersidad sa siyudad sa Sugbo ug kauban usab niya nga nag-estar sa usa ka boarding house sa dalan Imus. Parehas usab sila nga taga Mindanao nga mga anak og tubigtubigang mga ginikanan nga magpadala kanila sa ilang binulang alawans matag semester, lakip na sa bayranan sa tuition fees.

Silang unom parehas na usab nga mogradwar sa ilang tagsatagsa ka mga kurso ning semestera. May namatikdan si Marman sa lima ka kauban niyang  boarders. Nahilig kini sa pag-inom og beer inigkadawat na  nila sa ilang binulan nga alawans.

“Uban ka namo, Bay Mar! Lingawlingaw ta kay Sabado bitaw ron.

“Way klase ron, Bay Mar! Ayaw mi’g balibari sa pag-join...!”

“Bitaw! Si Mar lang ang wa pa makauban sa atong grupo....!”

“Tampotampo lang gud ta, Mar...!”

“Pakisama lang gud, Mar! Panagsa ba...!”

Tungod kay mapugsanon kaayo ang lima niya ka kaubang boarders ug estudyante, napugos pagkuyog si Marman sa grupo sa unang higayon. Hilabihang sadyaa nila sa pag-inom og beer sa usa ka beer house nga ginuntan sa bidyoke. Unya, gidala na usab si Marman sa pagpanglakaw nila ni Henry, Boy, Jimmy, Edgar ug Nelson aron magtiwas sa lingawlingaw sa usa ka dapit.

Napahunong si Marman sa paglakaw. Sa pagtipas sa kaubanan niyang lima ka boarders sa dalan nga ilang padulngan, nakahukom siya nga dili na lang mokuyog sa grupo. Misakay siya og taksi ug nagpahatod sa gi-estarang boarding house.

Pagkaugma, nagkaguliyang ang tanan mga boarders sa boarding house nga gi-estaran ni Marman. Nakugang usab siya sa gibalita sa ilang landlady sa boarding house, nga sila si Henry, Boy, Jimmy, Edgar ug Nelson nagtingkagol sa karsel. Naaktohan sa mirondang taga PDEA kagabii nga naghithit og shabu sa usa ka balay nga nabantog nga suyopanan sa siyudad. Wa tuyoa, nagkibotkibot ang baba ni Marman nga nakahangad sa Kahitas-an.

“Maayo ra gyud nga mitipas ko’g dalan kagabii ug wala modayon sa pagkuyog sa grupo...!”

Miluag ang dughan ni Marman. (Kataposan)