Gidid-an sa pagsundo

Power Inday Misyel,

Tagoa lang ko sa pangalan nga MJ, 17 anyos ug ulitawo. Ang akong problema bahin kini sa ginikanan sa akong GF. Kining akong uyab subra nako ka pinangga. Unsay akong makaon, hatagan nako siya. Ang akong GF nagtrabaho duol ra sa ilang gipuy-an. Tungod sa akong gugma, kanunay nako siya’ng sunduon matag-gabii apan ang iyang ginikanan ug mga igsuong babaye masuko. Naglibog ko unsay akong sala nga wala man ko’y gibuhat nga daotan sa ilang anak. Dili kuno angay’ng hasulon pa nako ang akong GF kay basin unya kuno’g makapatay ang iyang amahan. Unsa man ang angay nako nga buhaton aron dili na masuko ang iyang ginikanan? - MJ

Power MJ,

Aron paglikay sa kagubot, tumana lang usa ang hangyo sa mga ginikanan sa imong GF. Labing maayo nga hatagan nimo og respito ang kagustohan sa mga ginikanan sa babaye kay pinaagi niini morespito usab sila kanimo. Normal lang sa mga ginikanan nga mahingawa sa ilang mga anak, ilabi na’g babaye ug batan-on pa nga anaa pa sa ilang poder. Ayaw hatagi og bati nga kahulugan ang ilang gihimo. Ikaw, bata ka pa man, pangita usa og trabaho o padayon sa pag-eskuwela aron may dungog ang imong kaugalingon ngadto sa ginikanan sa babaye. Dili makakumbinser sa ginikanan sa imong GF ang pagsige’g sundo ug paghatag og pagkaon sa ilang anak. Ang imong pagkatawo ug ang kapasidad sa pagbuhi og pamilya maoy dako’ng basehanan nga ikaw ila na nga madawat isip umaabot nga bana sa ilang anak. Sa bibliya pa, "Let your light shine before men in such a way that they may see your good works, and glorify your Father who is in heaven.”(Mathew 5:16) - DJ IndayMisyel/09995894692