Ang playboy

Gula 6

Nakita ni Caloy nga dihang mibiya na si Lowela gikan sa iyang lamesa gisugat siya sa waiter ug aduna kini gihunghong. Nasabtan ni Caloy nga mora’g misinta si Lowela human niini mapaminaw ang gisulti sa waiter.

Dihang misugod na pagtugtog ang musika, migawas si Lowela sa pultahan nga adunay kurtina ug mipaingon kini sa taliwala sa gamay’ng stage. Misamot ang kaibog ni Caloy ngadto kang Lowela tungod sa pamorma sa panglawas sa dalaga.

Sa hilom nakapanglad-ok si Caloy sa iyang laway samtang nagtutok sa madanihon nga lawas ni Lowela. Ang gamay’ng hawak ni Lowela inubanan sa porma kaayo niini nga sampot ug madanihon kaayo nga paa, maoy nakapasamot sa kaikag ni Caloy nga maangkon niya ang maanyag nga Bol-anon.

Wala tuyoa nga napalingi si Caloy sa lalaki nga diha sa pikas lamesa. Mao kini ang lalaki nga naibog kaayo ni Lowela ug giingon nga mamugos sa pakigdeyt sa dalaga. Nagduda si Caloy nga kini maoy nakauknol na usab ni Lowela dihang may gisulti kaniya ang waiter.

“Akong giingnan sir nga gusto’ng makigdeyt kaniya kanang lalaki sa pikas lamesa, pero mora man og walay gusto,” matud sa waiter nga gipangutana ni Caloy.

Nakapangagho si Caloy. Mao diay nga klaro kaayo nga napikal si Lowela. Nasabot ni Caloy nga walay gana si Lowela nga misayaw sa stage. Human niini og sayaw ni Lowela, mibalik kini sa lamesa ni Caloy.

“Naproblema ko dok kay anaa na usab ang maong tawo nga magsige og hagad nga makigdeyt nako bisan wala ko’y gusto,” ni Lowela pa. Gipasiplatan ni Caloy ang lalaki nga nagtutok usab kanila.

“Gusto ka ba nga ako’y makigdeyt nimo karong gabhiona Wel?” matud ni Caloy. Wala dayon motubag si Lowela…taud-taud. “Sige huwata ko sa gawas dok, pag-atang lang daan og taksi kay aron mosakay lang dayon ko iniggawas nako ug dili na niya masundan,” ni Lowela pa. (Sumpayan)