Halin sa linabay

Domingo alas dos sa hapon naghinamhinam si Melany nga nidawat sa P48 nga halin sa mga plastic nga linabay sa iyang amo. Gitigom niya ang mga basiyo sa bottled water nga gipanglabay sa iyang amo. Nagpahiyom siyang nidawat gikan sa pumapalit og junk nga nag-house-to-house sa pagpamalit.

“Salamat, Noy,” ni Melany ngadto’s hamtong lalaki nga nibayad sa usa ka sakong basiyong botelyang plastic. Nalipay siyang may subra siyang kita gawas sa iyang suweldo.

“Way sapayan,” sa tawo nga nagkabiba sa sako.

Diha sa nataran sa balay sa iyang amo sa baryo Tambon ning dakbayan nadawat ni Melany ang bayad sa mga plastic. Unang higayon siyang nakadawat og kuwarta gikan sa mga basura. Mapahiyumon siyang nilakang padulong sa sulod sa balay sa iyang amo. Tayming sab nga natulog iyang amo, ang magtiayong Jimmy ug Sonia, mga magtutudlo sa saring publiko.

Gipahibawo lang siya ni Lenlen, maid sa silingan nga dunay mamalit sa mga plastic ilang tinigom. Maong nakadalikyat siya’g pagawas sa sako gisudlan sa iyang tinigom.

“Pilay halin sa mga plastic?” ni Jimmy sa pagsulod ni Melany sa sala sa balay. Nakugang siya nga nagmata diay iyang Sir.

“Ah, kuwarenta i otso pesos, Sir,” ni Melany nga nikanga.

“Ambi ang kuwarta. Ingari nako!” ni Jimmy sa estrikto nga tunada. Nagtunol sa iyang tuong palad nga binukhad. Nagpanagana og hatag si Melany. Apan wa siya’y mahimo. Mandar sa iyang amo.

Kaingnunon siya nga “kalain ni Sir. Linabay na man ninyo ang mga plastic. Imohon pa gyud diay ang halin?”

Gihatag ni Melany ang kuwarta ngadto sa amo, nga way tingogtingog. Ug nipadayon siya sa kusina diin may hugasanan siyang mga plato, baso ug ubang gamit sa ilang pagpaniudto. Apan nagrigor gyud iyang hunahuna.

Nakatuaw siya sa hilom nga “kadawo ba diay sa akong amo, nga ang halin sa linabay daginoton pa man?” Ug nakahukom siyang di na maghago og tigom sa mga linabay. (Kataposan)