Gustong mabawi

Power DJ IndayMisyel,

Nahibaw ug kaila ko nimo IndayMisyel, ikaw lang ang wala. Gusto nako makuha ang akong girlfriend ug among anak, naa sila nakapuyo sa iyang ginikanan. Pero sa di pa ko nimo tubagon, ako na priso sa walay klarong hinungdan. Nagtipon na kami kaniadto sa akong GF, usa ka adlaw migawas ug miadto ko sa akong inahan arun kuhaon ang sud- an nga iyang gipaluto, unya gi-text ‘ko sa akong GF nga may nangita nako. Mao nagdali ko sa pag-uli, pero pag- abot nako kalit ko giposasan, gikulata hangtud nabun-og ko. Sa akong pagkapriso, igo lang gipasanginlan sa sala nga wala ko kahibaw. Karon nakagawas nako, miprangka sa ako ang ginikanan sa GF nako nga magbuwag na lang mi. Pero gusto nako sila makuha, unsa may angay nakong mabuhat? Pwede ba makuha nako ang bata? Unya ang among balay gihurot og kuha ang mga butang sa iyang ginikanan. Bunso

Power Bunso,

Well, tambag nako nimo, usba ang imong mga negatibong buhat nga basin maoy ilang gikasilo. Pangita og panginabuhian, negosyo ba or trabaho. Ug pagpaubos og pagsugod sa uno pagpanguyab og balik sa imong GF . Bisa’g unsa pay isulti sa ginikanan niya, hala dawata apan ayaw idibdib. Ipadayon ang imong tinguha nga imo sila makuha pagbalik sa maayong paagi, ipakita sa ila nga bisan napriso, apan may kapasidad ka nga makabuhi ug makahatag og maayong kaugmaon sa imong pamilya hangtud makuha nimo ang pagsalig sa ginikanan ug ilabi na sa imong GF nga maoy inahan sa imong anak. - DJ IndayMisyel