Jezebel

“Pakigsultihan ko si Jerome.” Nagkanayon si Edward. “U-unsa?”

“Pasidan-an ko siya nga dili na magsamok nimo...sa atong relasyon.”

“Ayaw na lang, Edward. Dili na kinahanglang makigsulti ka pa kaniya. Total, wala man gyud siya’y paglaum nako. Igo na nga imong nasayran nga nangulitawo siya nako aron dili ka makaingon nga may gililong ako kanimo.” Nagtuo ko nga mipatuo si Edward sa akong gisulti. Apan ako na lang nasayran nga gipakigsultihan gyud diay niya si Jerome usa ka hapon niana sa amo nang pagpamauli gikan sa eskuwelahan. Wala sila magkasinabot. Nagkasinumbagay sila.

Matud pa sa usa namo ka classmate nga maoy nagtaho nako, bun-og kuno kaayo si Jerome kay wala kini dag-anan sa sumbagay nila ni Edward. Apan nakaangkon usab si Edward og bun-og sa nawong mugna sa makusog nga suntok ni Jerome nga miigo kaniya.

Sa akong kabalaka, nangita ko’g paagi nga magkasulti kami si Edward.

Didto ko siya gikahibalag sa merkado. Nangita mi’g dapit nga medyo layo sa ubang mga tawo aron magkasulti mi’g maayo. Gisukit ko siya bahin sa akong nabalitaan nga panag-engkuwentro nila ni Jerome. Gisuginlan ko niya sa nahitabo. - Sumpayan pa