Ayaw na patental

Power DJ Inday Misyel,

Usa ako sa tigbasa sa Banat News ug imong tigpaminawan sa DYKC gikan sa 10:30 to 12 midnight. Ako si Star, 22, taga Guadalupe, Carcar City. Duna ko’y live in partner karon, may duha mi ka anak, babaye ug lalaki. Kining akong kapuyo karon panakip butas nako ni kaniadto diha’ng nag-break up mi sa akong unang BF. I really love this no.1 guy apan nagbreak up mi kay nakapamabdos. Sige ko’g hilak kay painful kaayo sa akoa ang break up. Ang guy No. 2 amigo ra nako siya sa sinugdanan. Gibuhat niya nga malipay ug akong malimtan ang tanan bisan wala siya mauyoni sa akong kabanay. Ang akong ka live-in, mitrabaho sa Manila. Ang problema, mibalik si Guy no. 1 ug I still love him, pero kahibawo ko nga sayop ug unfair kini sa akong ka-live in. Unsay akong buhaton?- Star

* * *

Dear Star,

Dili na kana tukma karon sa imong sitwasyon nga dunay 2 kids ug buotan nga amahan sa mga bata. Kaloy-a ang imong pamilya. Sunda ug atubanga ang kamatuoran nga dili na mahimo nga ipadayon pa ang inyong pagkabuang sa usa’g-usa. Focus sa imong pagpuyo. Tabangi ang lalaki nga maoy misagop, mihatag ug pagmahal nimo dihang ikaw diha sa kaguol kay mao ni ang klase sa lalaki nga tinuod nga nagmahal kanimo. Ang samokan nga Guy No. 1 usa lang na ka binuang ang iya. Hangyoa ang imong ka live-in nga magpakasal na kamo. Palawmi pa ang imong gugma sa bata ug sa amahan niini labaw na ang Dios. Ang gugma maoy moluwas bisan unsa’ng kahuyang ug sala. - DJ IndayMisyel