Pangayo ug hatagan ka

Atubangan sa imahen ni Sr. Sto. Niño, miluhod si Nikol ug nag-ampo: “Ginoo, tabangi ko nga makabalhin pagtrabaho ngadto sa usa ka international nga barko. Di na paigo akong suweldo sa gialagaran kong inter island vessel.

Ilabi na, nga patay na si Papa Tikboy ug si Mama Nora na lang ang among gisaligan, kinsa usa lang ka janitress. Talianak pa gyud akong misis, Sr. Sto. Niño.”

Nanghalang ang kasingkasing ni Nikol timaan sa hugot niyang pag-ampo. Ug migawas siya sa simbahan nga nag-umog pa iyang kaapingan sa mga luha.

Milahos siya sa piyer dala ang iyang travelling bag. Igo lang siyang nakasakay sa M/V Princess, milarga gilayon ang barko.

May higala si Nikol nga taga Tambo, Parañaque. Didto siya moestar samtang nanimpalad pagpangita’g barkong pang-international nga kabalhina’g trabaho. 30 ka adlaw iyang leave, diin usa ray tumong -- makalayat la’g laing dakong barko sa gawas nga makahatag niya’g dakong suweldo.

Ikatulong adlaw sa iyang pagbalikbalik sa Luneta, samtang naglingkod sa sementadong lantay ubos sa landong sa narra, kalit lang may miduol ni Nikol -- usa ka batan-ong lalaki nga gaan kaayo’g buot. Mitanyag ni Nikol nga kuyogan siya didto sa opisina sa mga barkong langyaw nga nanginahangla’g aplikante, diin ang suweldo dinagkong kantidad sa dolyares.

Dako ang kahibulong ni Nikol nganong wala siya lisodlisora sa recruiting officer nga miinterbiyu niya. Gani, on the spot, gi-eskedyul man dayon siya kanus-a pasugda’g trabaho isip, Head Electrician sa mga Norwegian Ships.

Haskang lipaya ni Nikol. Gikan sa maong opisina, nagdali siyang mibalik sa Luneta aron pasalamatan kadtong batan-ong lalaki nga mihatud-tabang niya. Apan nasiksik na lamang niya ang tibuok palibot, wala na niya kini ikahibalag.

Unya, wala lang tuyoa, may nahinumdoman si Nikol -- niadtong adlaw nga molarga na siya paingon dinhi sa Manila, diin mituyo gyud siya’g hapit sa Basilica del Sto. Niño ug may gipangayo sa Balaang Bata nga gisulod sa estante.

Nanglimbawot ang mga balhibo ni Nikol dihang namay-ungan niya nga ang nawong niadtong batan-ong lalaki nga mitabang niya.

Ang lagumon niining pamanit, ang kulot niining buhok ug ang panagway niini. “Siya kaha kadto?” Mao ray nalitok ni Nikol nga daw naestatuwa sa iyang nahimutangan. (Kataposan)