Kahulogan sa kinabuhi
Ma, kaniadtong bag-o pa lang kang nabiyuda, ga-edad pa tingale ka’g 55, kay 57 man to’s papa pagkamatay, wa hinoon ka nahigugma. Karong 66 ka na, mao pay pagkakita nimo’g gugma sa ikaduhang higayon?” ni Joseph ngadto’s iyang inahan nga naglingkod sa sopa sa ilang sala.
Tupad sa iyang Mama Vina karong buntaga, sa iyang wala, si Noy Teddy, 71 anyos, biyudo. Nituyo gyud sila’g ari sa balay ni Joseph, kinamaguwangan sa lima ka anak. Nanuhod sa anak ang mga tiguwang naghinigugmaay.
“Ikaw ra may nia sa Sugbo nagpuyo. Ang tanan nimong mga manghod tua puyo sa Mindanao. Niari gyud mi nimo kay ikaw ilang giagad isip kinamaguwangan. Kun di ka supak sa among relasyon ni Teddy, wa sab sila’y supak,” sa Mama Vina ni Joseph. Daw nagpakiluoy sa anak.
“Makahimo pa diay ka, Noy Teddy?” ni Joseph. Dalang komedya. Nibira og bangko nga plastic ug nilingkod atubangan sa duha ka bisita.
“Ah! Ehem!. Urg! Ahhh!” nikarat ang tutunlan ni Noy Teddy. Daw nadunlan.
“Anak, ang relasyon sa nagminahalay, dili importante ang pakighilawas. Ang pinakabililhon sa tawo nga nahigugma siya. Ug gihigugma sab siya sa binuhat nga iyang gimahal. Sa pagkamatay ni papa nimo, onse anyos kong nag-antos sa kamingaw. Daw wa nay pulos akong kinabuhi. Karong niabot si Teddy, nahibalik alang nako ang kahulogan sa kinabuhi,” sa Mama Vina ni Joseph. Seryoso. Niyangoyango na lang si Noy Teddy. Nagpahiyom.
“Ok. Ma, Noy Teddy. Nalipay ko alang kaninyong duha. Hinaut nga mapamatud-an ninyo sa usa’g-usa ang inyong gugma,” ni Joseph.
Nitulo ang luha ni Vina sa kalipay. Nibarog. Nigakos sa iyang anak.
“Salamat sa imong pagtugot, anak,” sa inahan. Nitindog sab si Noy Teddy. Gilamano si Joseph. (Katapusan)
- Latest
