Jezebel - Gula 13

Dihang nakabiya na sila si Tatay ug Nanay sa among gipuy-an, gibuksan nako ang TV ug mitan-aw og salida aron pagpukan sa kalaay sa pag-inusara. Apan wala dangti’g dugay, nahiabot si Edward.

Gipalong nako ang TV dihang misulod si Edward sa sala. Nakugang ko sa kalit niyang pagsulod nga wala man lang gani manuktok sa pultahan.

“Nganong midiretso ka man la’g sulod?” sukit ko niya.

“Unsa man go’y naa niana?” Misumbalik siya’g pangutana. “Nasayod man ko nga ikaw rang usa ang nahibilin karon dinhi sa inyo.”

Wala ko motingog.

“Asa man diay tong imong tatay ug nanay?” Sukit ni Edward.

“Moadto man kuno to sila sa Ubay,” nako pa.

“Maayo hinuon aron makalugar ta.”

“Naunsa ka diha?”

“Lagi.”

Mitingsi si Edward. Dayon nagkatinutokay mi. Hagkot ang among mga tinan-awan.

Unya inanay gipaduol ang iyang ngabil sa akong ngabil. Nasingo nako ang humot niyang gininhawa nga nakapanlimbawot sa akong mga balhibo.

Giukoban ni Edward ang akong mga ngabil. Wala madugay, nagtinal-opay na ang among mga dila sa pinadulot nga hinagkanay. -- Sumpayan pa