Sagbay-luwag

Gula 6

“Ibog kaayo ko nimo nga nagtan-aw ganina didto sa bakeshop Mel,”  walay lipud-lipod nga giingnan ni Narding ang dalagita. Nakapahiyom si Melody nga nakadungog sa gibutyag kaniya ni Narding nga iyang amigo.

“Ganina ra diay?” matud ni Melody nga kantalitahon kaayo ang pahiyom nga misud-ong ni Narding. Alang kang Narding mora’g gihagit siya sa dalagita apan aduna ‘say posibilidad nga nangomedya lang si Melody.

Gi-follow up ni Narding ang una niya nga gisulti sa dalagita. “Kun naibog man ko nimo ganina nga dili pa kita amiga, samot na karon Mel nga dia ka na uban kanako,” giingnan niya si Melody.

“Bigot kaayo ka’g lawas Mel uy, unya puti ug hamis kaayo ang imong mga paa. Balbon pa g’yud ang imong mga bukton, sa laktod makabibihag ka g’yud nga sud-ongon ug walay lalaki nga dili bation og kaibog nimo Mel,” puno ni Narding.

Wala makatingog si Melody nga nakadungog sa mga paghulagway ni Narding sa iyang kaugalingon. “Pwede ba og lipayon mo ako Mel, ug ako na ang bahala sa imong mga panginahanglan,” kalma ang tingog ni Narding ngadto sa dalagita.

Nakasiguro si Narding nga nakasabot si Melody sa buot niya ipasabot. Hinay-hinay nga gihuhapohap ni Narding ang bukton ni Melody. Wala maglihok ang dalagita ug dungan usab ang paghuros sa bugnaw kaayo nga huyohoy.

Nakabantay si Narding nga gibati og katugnaw si Melody mao nga anam-anam niya kini nga giganoy paingon sa iyang lawas. “Mosugot ka ba sa akong gihangyo nimo Mel nga imo ko’ng lipayon karong gabhiona?” gisukna ni Narding si Melody.

Milingi-lingi si Narding sa palibot, adunay laing nagdeyt pero atua ra sa unahan nga nagpasalipod sa mga tanom. Gigakos paghinay ni Narding si Melody nga wala na magtingog.

Nakabantay si Narding nga gihakop na siya sa talagsaong pagbati. “Mo-kiss ko nimo Mel ha?” pananghid ni Narding kang Melody. (Sumpayan)