Sagbay-luwag - Gula 4 Wala
Wala motingog si Melody diha nga gipangutana kini ni Narding kun asa sila sunod mopaingon human niya mapaliti og bag-ong selpon ang dalagita.
Wala pugsa ni Narding si Melody sa pagtubag kay nakasabot siya nga naglisod ang dalagita kun unsay iyang itubag. Didto niya gidala si Melody sa SM City aron makapili gayud kini sa magustoan niya nga selpon.
“Sige, pamili na kay balikon tika. Molakaw usa ko’g kadiyot kay mag-withdraw ko’g kuwarta sa ATM sa unahan,” giingnan ni Narding ang dalagita. “Basin dili ka na mobalik ha?” paraygon kaayo ang tingog ni Melody.
Igo lang mipahiyom si Narding ug gidunganan sa pagpikpik niya sa abaga sa dalagita. Swerte si Narding kay adunay ATM booth sa duol ra gikan sa baligyaanan og selpon.
Mi-withdraw si Narding og P20 mil. Bana-bana niya, paigo na kini nga ipalit sa selpon nga magustohan ni Melody, total may kuwarta pa man siya sa pitaka.
Gisulod ni Narding ang P20 mil sa iyang bulsa diha sa dughan nga bahin sa T-shirt nga iyang gisul-ob ug mibalik siya sa baligyaanan og mga selpon. “Nakapili ka na ba?” giagbayan ni Narding si Melody.
“Mahal man, kapin sa ten thousand ang presyo,” dali nga tubag ni Melody. “Walay problema, hain man ana ang imong nagustohan?” matud ni Narding nga mituyo na g’yud sa pagpabag-id sa iyang dughan ngadto sa buko-buko ni Melody.
Gitudlo ni Melody ang selpon nga iyang nagustoan. Nindot g’yud tuod nga touchscreen nga selpon. “Day pilii og maayo nga kolor kini nga brand,” giingnan ni Narding ang tindera. “Paliton g’yud nimo? Salamat g’yud kaayo ha?” daku kaayo ang ngisi ni Melody nga mitan-aw kang Narding. (Sumpayan)
- Latest
