Second degree

Dear Tita Salie,

Hi! Good day. And how are you? Just call me Mr. Piolo, ulitawo. Ang akong problema mahitungod kini sa akong lovelife.

Sa sinugdan pa lang lisod na gyud kaayo ang among relasyon tungod kay kining akong uyab second degree cousin nako ug akong pag-umangkon sa pag-agawan.

Nagkabulag na mi sa una, apan after 4 months nagkabalik ra pud mi. Nalipay ko, Tita Salie, sa among pagbalik tungod kay love man gyud nako siya.

Apan karon mibalhin na sila pagpuyo. Layo na gyud mi ug wala na ang among communication. Dili na pud ko makateks or call kay gikuha man sa akong papa ang akong selfon dihang iyang nasayran nga nagbalik mi sa akong ig-agaw.

Mora’g dili nako makaya kun mawala siya sa akong kinabuhi. Unsa may akong buhaton, Tita Salie?

* * *

Hello! Good day. Ayaw na padayona pagbuhat ang butang nga sa sinugdan nasayod ka na nga usa kini ka dakong sayop.

Nasayod ka na nga dili gyud puwede ang maong relasyon nga magpadayon, busa, dawata na kini ug ayaw limbongi ang imong kaugalingon. Tungod kay segurado ko nga mas dako pa unya ang imong problema sa umaabot kun mamugos gyud ka sa maong gugma.

Gituyo gyud seguro sa kahigayonan nga mobalhin sila pagpuyo aron layo na mo sa usa’g-usa ug dili na nimo siya perming makit-an. Seguro sa ingon niini nga kahimtang hinayhinay usab nimo  siyang makalimtan. - Tita Salie