Bulawano’g kasingkasing si Petra

Pagkaluoy man ni Sebya nga dili man pagawason sa doktor sa Sugbo kun dili mabayran ang billing niya sa ospital, nagkanayon si Petra ngadto sa iyang bana nga si Dolpo usa ka gabii niana.

“Pilay bayranan?” pangutana ni Dolpo.

“Trayenta mil siguro,” tubag ni Petra.

“May bayranan diay na nga public hospital man na?” pangutana otro ni Dolpo.

“Bitaw apan sa mga tambal ug kaon diay niya sa ospital libre lang diay na?” pamahayag ni Petra.

Silingan nila si Sebya. Gagmay pa ang mga anak nga tulo ka buok. Manananggot iyang bana nga si Sebyo apan palahubog ug sugarol.

“Wala diay motabang si Doro iyang igsuon man na nga may pagkabutang tiaw mo’y tulo kabuok sakyanan nga pasaheroan,” sulti pa ni Dolpo.

“Ayaw la’g laom anang Doro nga motabang kay tihik ug  laog kaayo na,” temang ni Petra.

Mipadayon si Petra,” luoy man kaayo ko ni Sebya nagniwang ug nag-ubo-ubo na lang sa konsumisyon gumikan sa bisyo sa iyang bana.”

“Unya unsa may plano mo,” pangutana ni Dolpo.

“Maayo ma’g lakaw sa halin ang atong tindahan og kopras bayran lang nato ang ospital para makagawas na si Sebya. May Diyos bitaw nga nagtan-aw sa atong gibuhat ug Siya na lay mag-igo nato,” sulti ni Petra.

“Bilib ko nimo Petra kay may bulawanong kasingkasing gyud ka.” Nakatuaw si Dolpo. (Kataposan)