Love ko si Doktora

Gula 9

Human sila makakaon, nag-iyaiya pagpamauli ang mga bisita ni Marco kay sagad niini iya ra man nga classmate sa UV. “Dili diay mo mag-deyt ni Dra. Marlyn dong? Birthday gud nimo karon, suroy-suroy ‘sab mo uy,” matud sa testisan nga iyaan ni Marco.

Mingisi si Marlyn ug nangatarungan nga dili man siya hilig og disco. “Bitaw Mar, Domingo man ugma, wala ka man diay duty, manuroy ‘sa ta,” matud ni Marco nga mora’g nadutlan ra sa pagsige’g sulsol sa iyang iyaan.

Sanglit dili man hilig og disco si Marlyn, didto ra sila manuroy sa gitawag og Lantaw, usa ka kan-anan nga nahimutang sa ibabaw sa bungtod nga nag-umbaw sa kinatibuk-an nga dakbayan.

Nakita nila nga sagad sa mga customer nagpares-pares g’yud nga mga babaye’g lalaki ug masabot nila nga mga managhinigugmaay. Miorder si Marco ug duha lang ka botelya nga light beer.

“First time pa g’yud nako ni nga pag-inom og beer Marc,” matud sa doktora.  Igo lang miyango si Marco. “Good, gusto ko nga moinom ka lang og beer kun kauban ka nako aron adunay makabantay nimo,” ni Marco pa.

Abtik kaayo nga mitubag si Marlyn. “Mora diay og ikaw ang akong guardian angel Marc.” Nakapahiyom ‘sab si Marco ug nakahuna-huna og maayo nga tubag ngadto sa doktora.

“Tinuod Mar, gusto ko nga mahimo’ng imong guardian angel sa tibuok mo nga kinabuhi,” ni Marco pa nga salabtonon kaayo ang pagkasulti. Nakasabot si Marlyn nga may buot ipasabot si Marco kaniya.

“Unsay buot mo ipasabot Marc?” sukna ni Marlyn. Gitutokan ni Marco ang dalaga nga doktora ug nagkatinutokay sila’ng duha. “I love you Mar and I hope nga dili mo ako pakyason,” matud ni Marco dungan ang paggunit sa kamot ni Marlyn.

Wala g’yud dayon makatingog si Marlyn sa iyang nadungog. Apan dayag kaayo sa iyang panagway nga wala niya ikasuko ang pagpanguyab ni Marco kaniya atol gayud sa birthday sa ulitawo. (Sumpayan)