Mabulokon nga kinabuhi

Paggradwar ni Jessie sa hayskul sa ilang probinsiya, nanimpalad siya sa siyudad. Nagpa-boy si Jessie sa grahean og mga taksi. Hangtud nakat-on siya’g drayeb. Nadawat dayong drayber og taksi dihang may lisensiya na.

Abi niya’g laay ang kinabuhi sa drayber sa taksi. Gawas sa risgo nga matulis, way laing peligro. Anha ra man siya mag-estambayan sa mga department store. Linyalinya lang. Hatud og pasahero, dayon balik og linya. Nisamot iyang kalingaw nga daghan siyang mga istorya nadungog gikan sa mga pasahero. Talagsaong mga hitabo nga wa sa libro, radyo, TV o sine. Mga sekreto sa kinabuhi sa tawo nga dinhi lang nahisgutan sulod sa iyang gimanehong taksi.

May pasahero nga nisugilon sa iyang kasakay nga sa grade 3 pa siya, pobre kaayo sila. Tungod sa kagamay sa ilang balay, usa lang ka lawak, mahikapan usahay niya ang di mao. Usa ka lawom gabii nga nanghuyatid siya, nahikapan niya ang kinatawo sa iyang papa. Basabasa pa kay bag-o pa tingaleng nagamit sa pakighilawas sa asawa. Gisugilon niya sa higala, nikatawa ang higala. Ug nihimo sab og laing sugilanon diin nagdamgo siya nga nangawot og kamote. Unya, imbis kamote ang naibot, kinatawo sa amahan.

Nalingaw si Jessie nga naminaw sa mga sekreto sa kinabuhi sa iyang mga pasahero. Di man sab maayo nga iya ning ipanabi. Iya na lang gihimoan og sugilanon. Dangta’g tuig, nagtinir na siya’g notebook sa glove compartment. Aron ikasulat niya iyang mga nadungog. Aron di niya malimtan samtang wa pa siya’y panahon sa pagsulat niini.

Nakaingon si Jessie sa kaugalingon nga mabulokon man diay ang kinabuhing taksi driver. Tigtampohan na siya’g mga sugilanon sa Banat News. Nadasig siya’g samot sa panulat dihang nakabasa siya’g artikulo mahitungod ni Mark Twain usa ka sikat nga manunulat. Nahinumduman niya ang pulong sa tagsulat nga nag-ingon “To write a good fiction, know all the truth you can and twist them all you can.”

Busa, sumala sa iyang nakat-onan, ang fiction o sugilanon di tinood, basi o batay gihapon sa tinood nga hitabo. Madugaydugay pa tingale siyang pul-an sa pagkadrayber og taksi. (Katapusan)