Isla Paraiso

Gula 256

Kaniadto, ingon sa kapin na sa usa ka tuig ang usa ka adlaw nga dili makita ni Rey si sister Veronica. Apan karon mosugot na siya nga dili sila magkita hangtod sa kahangtoran.

Usa niana ka adlaw, si Rey kalit lang mitungha sa dakbayan sa Sugbo. Midiretso siya sa kuwerpo sa kapolisan. Dili tiaw ang gibating kahikugang sa iyang mga kaubang polis sa kalit niyang pagbalik. Dugay siyang wala motumaw. Hinuon, nasayod na sila nga didto siya sa Isla Paraiso gumikan kay gisuginlan man sila ni Corporal David Benturada. Apan wala sila magdahom nga motungha si Rey sa panahon nga wala nila damha nga moabot kini.

Mibati og dili tiaw nga kahinangop si Capt. Sancho Benale sa pagbalik ni Rey. Gikinahanglan kaayo si Rey sa kuwerpo sa kapolisan. Talagsaon ang iyang abilidad ug kaisog sa pagpakig-asdang  sa mga kaaway.

Mibalik si Rey sa serbisyo. Giasikaso ni Capt. Benale ang iyang promotion sa iyang kalamposan pagpuhag sa pundok sa mga tulisan nga gipangulohan ni Col. Martin Villadar.

Usa niana ka adlaw, gipatawag si Rey ni Capt. Benale sa buhatan sa naulahi. Miadto gilayon si Rey. Dili tiaw ang gibati niyang kalipay  dihang gisuginlan siya sa kapitan nga na-promote na siya.

Paggawas niya sa opisina sa kapitan, nagkasugat sila si Danica, ang anak ni Capt. Sancho Benale, sa gawas sa pultahan. -- Sumpayan pa