Gilitok sa kasingkasing

Doktor ang Lolo Celso ni Fe, amahan sa iyang Mama Sonia. Doktora sab ang iyang Lola Nova, inahan sa iyang mama. Moreklamo usahay iyang mama ngadto’s iyang mga apohan. Nga na-spoiled si Fe nila. Kay pinangga kaayo nila si Fe. Kinamaguwangan man sab gud siya nga apo.

Grade 3 na karon si Fe. Kompleto na siya sa mga modernong mga gamit. May selpon. May tablet. May I-pod. Gikan sa iyang mga apohan. Kay ang mga ginikanan ni Fe, mga propesyonal tuod, pero dili kaapord sa kapritso sa anak.

Computer engineer ang Papa Jessie niya. Psychologist iyang mama. Dagko sila’g kita apan di mogasto para sa mga duwaan sa anak. Tuition fee ray ilang bayran sa pag-eskuyla ni Fe, ug iyang mga libro. Dagko man sab sila’g gasto sa maintenance sa ilang mga bisyo sa Facebook Twitter ug panghindik. Sa pleteplete ug konsumo sa bata, mga apohan ang naggasto. Kay ipon nila si Fe. Weekends ra tigbisita iyang mga ginikanan.

Nangambisyon na sab si Fe og laptop pag-abli sa klase. Usa ka buntag, pagmata ni Fe, niduol dayon siya’s iyang lolo nga nagtan-aw og balita sa TV sa ilang sala.

“Good morning, Inday” sa iyang lolo nga mapahiyomon. Gihapuhap ang ulo sa apo.

“Good morning, lo. Lo, gabii pagdayon nako’g katulog, niliso ko sa wala. Naipit akong  dunggan sa unlan. Unya nadungog nako ang pinitik sa akong kasingkasing” ni Fe. Nilingkod sa sopa sa too sa iyang lolo.

“Unsa may tingog sa imong kasingkasing?” sa apohan. Nilingi sa iyang apo.  “Nakalitok man akong kasingkasing, lo” ni Fe. Seryoso.

“Unsa may pulong sa imong kasingkasing?” sa lolo, gisakyan ang apo.

“Matud sa akong kasingkasing lo, Laptop! Laptop! Laptop!” ni Fe. Nipahiyom. Pwerteng katawa sa apohan.

Pagkasunod adlaw, pagkahapon, dihang nauli na si Fe gikan sa eskuylahan, gihatagan dayon siya’g laptop sa iyang lolo. Di man magpanagana’g hatag iyang lolo niya kay dagko man sab siya’g score sa mga exams. Nisamot man hinoon kahait ang utok ni Fe nga dunay mga duwaan. (Katapusan)