Isla Paraiso
Mihana paglakaw si Rey. Apan ang pagsangpit ni sister Veronica sama sa usa ka kusgan nga kamot nga mihawid kaniya. Napahunong siya. Mibalik pag-atubang sa madre. Mapangutan-on ang iyang tinan-awan.
“Puwede ba, Rey,” sa madre pa, “n-nga sa kataposang higayon, gakson ug hagkan mo ako?”
Nahatutok si Rey sa madre pagkadungog sa gipamulong niini.
Si Rey nahatutok ni sister Veronica. Nagkabag-iray ang ilang panan-aw. Dugay si Rey nga wala maglihok sa iyang gibarogan. Si sister Veronica ang mihinay pagduol kaniya. Wala mabugto ang hagkot nilang pagtinutokay.
Unya, inanay nilang gipaduol ang ilang mga ngabil sa usa’g-usa. Wala makasabot si Rey sa iyang gibati niining higayona -- naghinamhinam ba siya o gikulbaan.
Sa dihang hapit na mag-abot ang ilang mga ngabil, si Rey kalit lang milingiw. Mihana siya pagsibog. Apan gigunitan ni sister Veronica ang iyang nawong dungan ang pagduot sa mga ngabil niini sa iyang mga ngabil. Wala na makalikay si Rey. Nahapagakos usab siya sa madre nga niining higayona migakos na kaniya.
Mora’g miutong ang mga gutlo. Sa dihang nag-ukang ang ilang mga ngabil, nagtinutokay na usab sila. - Sumpayan pa
- Latest
